相片來源: Peakhunter IG

在香港,一般跑手作任何較長距離 (一般100公里或以上) 的山賽,都會在大會提供的補給站以外,再自設補給,稱support位。

所以每逢報過一些長途比賽 (如每年比較多參加者的樂施會毅行者,而今次筆者所參加的是逆走100 Rebel Walker 2019),賽前除了練習路段、買裝備、規劃路線,SET目標時間外,很重要的是尋找合適的人作support team。

Support team當中的人可以有不同崗位,可以分兩種:

1. 跑得到就陪跑

跑得起的人可以陪跑,而陪跑員的功能也分兩種:

  • 就是可以幫忙減輕跑手的物理負擔: 例如幫忙咩起食物、飲品、power gel,拎pole拎外套,必要時拎埋 power bank 叉電, 總言之就是流動助理;
  • 另一個功能就是維持團隊士氣,減輕心理負擔。漫漫長夜,凌晨時段,走過80公里,還要多走20公里,如果只有你一人/一隊在山野,面對疲乏的身軀,意志力非常薄弱,要放棄確實很容易,呢個時候有個狀態好d 既人在你身邊,定期叫一叫你,防止進入迷糊狀態,高階啲可預備吹水 agenda,確保你時間不會因意志力薄弱而減慢,同時也看見跑手狀態,有咩事都有個照應,真係異常重要。

2. 跑唔到就作定位補給

而跑唔到既人就可以做另一個崗位,就是在指定位置預備跑手需要的物資,有揸車的朋友更好,比較容易預時間,set好個壇,跑手一到站就可吃個 “正餐”, 有多一點食物進肚,再重新整頓行裝,例如換衫換鞋,加外套等等。

攝: 本文作者

有人可能會問,點解大會都有補給站,重要自己set個?

當然需唔需要,或者要幾多站固然因人而異,高手既就邊行邊食,唔會停落黎補給,100公里的山路11 -12小時就完成,如8點起步,返到屋企睇埋《愛回家》先食飯都重得,但一般人。100 公里需要20-30小時,大會提供的食物往往未必適合所有人 (如安排不足,甚至可能未必足夠)。加上10幾個鐘之後,因身體能量大量消耗,人容易變得沒耐性和抑鬱,此時可以吃到平日喜歡的食物,看見喜歡的人,身心靈都作一次 refill,絕對不是可有可無的事!


而要搵合適的人去 support,真係唔係咁容易,我發現,如果你既 support team 有呢幾種特質,身邊有一個咁既團隊,確實非常幸運!

第一、對方盡可能要對越野跑有一定的認識,能夠知道你的需要,可以就陪跑,但吊詭的是,會跑的都去了比賽了吧! 不去比賽的也有他們的原因,可能受傷,可能沒空,剩下的也不會有太多人了。而咁難得都遇上了,要好好珍惜呢!

第二、有應變能力,因山賽的目標時間會隨跑手狀態有所變動,跑手快左到但無飯食真係搞唔掂,所以 support team 一定會提早到,但山上如有意外發生,跑手可能又會慢左 (試過比預期慢2小時,在獅子亭的 support team 乾等3小時呢) 食物凍左點算? 所以好多人都會有帶埋 cookset 或者保溫壺,萬無一失。

第三、他們必需有一顆樂於助人、任勞任怨的耐心與細心。走過長途,跑手每次達陣可能都會黑口黑面,因為佢哋行到已經冇表情,多一句野都唔想講,一埋站就會食野,而 support 既就會廚師/司機/物理治療師/小秘書/啦啦隊上晒身: 斟茶遞水,按摩鬆腳,預計埋佢哋需要,盡量減少佢每一個動作,重要 keep住道氣場,笑面迎人。

跑手停留嘅時間都唔會好長,但係做 support 嘅就要早幾個鐘準備。

呢類人係可以接受到你的脆弱醜陋,你亦知道佢地唔會介意你的無禮,唔需要你的客套。

呢種咁唔公平嘅關係,就係咁樣出現,究竟有咩人可以做到你既 support team?

作為山賽中的山菜,真係好想多謝 support 過我地嘅人,同埋想讚所有曾為跑手付出過的你你你你你,做support team真係唔簡單!

後記

越野豬隊在上週逆走100 (2019) 以21小時47分完成,幸獲四

人女子團體的冠軍,我地4隻野豬,初嘗冠軍夢,衷心多謝教練 KitChan,同埋所有 support 過我地既人。沒有你ssss,沒有我ssss!!!

ig: Meathillworld
Medium / WordPress: Meathillworld

編按:「越野豬隊- 4 PIG」奪得「逆走100」女子四人組別冠軍

Fitz連結: https://fitz.hk/?p=115850


更多:
Fitz Facebook專頁
[逆走100 2019] 個人賽激戰 男子11小時51分衝線
Fitz Running 跑步


文章為作者意見,不代表Fitz立場。

歡迎投稿: https://fitz.hk/contribute/

廣告
隨.肉山
體藝混血兒,山系菜鳥 X 女主音 豬隊友@ 越野豬(2019新成立女子四人越野跑隊) 希望有更多女生可以一起做運動。 ig: Meathillworld; Medium / Wordpress: Meathillworld