圖片來源: 阿步
開開心心跑步去，竟然慘淡收場。以下6件跑步遇到嘅黑到痺事件，你絕對無法扭轉頽勢，只能一笑置之！人總需要勇敢生存……
1. 牛肉乾
泊好架車，入錶，兩粒鐘。跑完之後返去，車頭多咗張牛肉乾。呀，中途hea咗一hea，跑多咗10分鐘，咁就320！
香港咪錶最多都係泊得2小時。高手想跑耐啲，就要回頭返去入錶。
2. 補給切斷
大愛青公，set咗中途加油站係屯門公路轉車站，點知去到所有汽水機跪低！
自從多咗個轉車站，跑青公多咗個補給。不過汽水機總有跪低嘅一日。
3. 跑步先嚟落雨
仲要係好大嗰隻。頂硬上，唱住「In The Rain Lonely Night，孤單街中舞」出發。結果，5分鐘後濕晒身，竟然又出太陽，要乾煎蝦碌。
波士頓馬拉松有專用雨褸派，渣馬都係金級賽事，點解我哋仲要去7仔買雨褸?
4. 八達通無錢
辛苦跑完20K，一心一意去便利店買嘢飲嘢食補充體力，撞啱前面有人交電費，又有人提款。身水身汗排咗好耐之後，到你畀錢嗰一刻，你先發現自己張八達通係負數！而最黑嘅係，你驚唔見嘢，專登帶住張無自動增值嘅八達通出街！
5. 無位放嘢
換好衫，諗住出發之際，發現運動場無Locker/自己無帶鎖。結果死死氣返屋企……
6. 個App出事
辛辛苦苦跑咗大半粒鐘，結果個跑步app竟然無資料？！一個無地圖嘅Cap圖，呃Like能力大打折扣！
呢35分鐘，究竟算唔算白廢?
哼，小小苦楚等於激勵，明天仍是要繼續跑！
更多：
Fitz.hk Facebook專頁
那些年，我在比賽時瀨過的嘢
[第三屆葉伯盃] 延續不停步精神 現已接受報名
長跑訓練要用盡100%能量?
Fitz Running 跑步
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。