----- 廣告 Ad -----
![](https://i0.wp.com/fitz.hk/wp-content/uploads/2019/03/-香港第六屆國際馬拉松之sub-3夢-3-e1551854940261.jpg?resize=365%2C680&ssl=1)
按圖放大
上回: [香港馬拉松史] 1983年香港第六屆國際馬拉松之sub-3夢 (上)
起跑
按大會公布,有349男、19女選手參與這次馬拉松。跑手們在場內熱身預備起步。雖然天氣寒冷,但跑手們擠在一起和口中呼出一團團的霧氣,反而令人有熱氣騰騰的感覺。
九時正,一聲槍嚮,馬拉松起步了! 幾百人繞著運動場走三個圈。嘻,响運動場起步,場內和場外沿途又有觀眾 (雖然唔多),有啲真正係選手嘅感覺! 睇住實力強勁嘅選手好快就走出運動場。亞霍自己知乜嘢料子,梗係按本子辦事啦。希望前十哩 (大會仲係用緊英制,無法唔咁計) 在65~70分鐘之間。首哩跑,時計為6:50 (即4:15/K)。與高佬拍住一齊;5哩,時計32:55 (平均4:05/K); 10哩,1:06:14 (平均4:07/K); 一切似乎頗順利,心中也覺得意外。在微雨寒風下,雖然已跑了十哩,但雙手就從未有暖和過;反之,還有一些凍麻的感覺。帶着單隻的手襪,惟有每隔幾哩就左手交右手,右手交左手的輪流穿下。高佬哥──神經刀,多得你嘞! 走咗咁耐,唔使講都知,鞋襪都濕哂啦!所以腳板就更加全無知覺,如果唔係靠對近視眼望下,都唔知腳板仲係跟住腳踭走呀!
----- 廣告 Ad -----
![](https://i0.wp.com/fitz.hk/wp-content/uploads/2019/03/香港馬拉松史-香港第六屆國際馬拉松之sub-3夢-13.jpg?resize=960%2C640&ssl=1)
2019年香港馬拉松超過7萬人參加。 圖: 渣打香港馬拉松 Standard Chartered HK Marathon
「牆哥」收數
15哩嘞,時間1:40:30;「牆哥」話係時間嚟搵神經刀追債,話神經刀欠K數未清喎! 咁呀,神經刀,唔該你同你個「牆哥」慢慢企埋一邊傾嘞。唔好意思呀,亞霍唔阻你哋嘞,亞霍女朋友等緊亞霍咖,唔使講再見嘞! 老友都係咁話,亞霍撇甩高佬,一個人繼續去兜8字圈!
仲有十餘哩,「牆哥」會唔會追上嚟搵埋亞霍呢? 亞霍要搵啲嘢塞住個腦,唔俾「牆哥」搏冷風毛雨乘機入腦! 於是,兩周前,1月9日嘅17.2哩萬宜水庫水塘盃賽事就响亞霍腦海獨家重播:
當日天朗氣清 (身體即時有暖和的感覺),亞霍走呢場比賽,開段是麥徑第一段的公路,當然無風無浪。不過走到崎嶇沙石碎路同落山,亞霍就真係舉哂手,數住數住,俾五、六十人超越──喂,好負面喎!「牆哥」好鍾意呢啲場面喎!
唔係,重播片段主要係後面嗰 part! 嗰日頹頹地走咗一個鐘頭三個骨後,終於走完哂啲山石路,出番馬路面。哼哼,到亞霍發惡嘞,嘩,幾乎可以見人過人,追番幾十人!「牆哥」見亞霍放呢個片段,於是灰溜溜咁,唔好意思嚟住,惟有等陣睇下點。
----- 廣告 Ad -----
完夢
近十一點嘞,氣温不但沒有上升,挾着寒風凜冽,反而悄悄然下降1~2度;單隻手襪輪流轉戴。手掌已經疆硬到連開筆筒也十分吃力。而每到水站前,亞霍就好擔心自己雙手,會唔會凍到接收唔到指令,連想濕濕口的水杯也攞不到。
20哩,2:14:28。正呀! 三小時就近在腳邊! 若果時間過了兩小時二十分,亞霍相信「牆哥」就會乘虛而入!但現在時間之好,亞霍不可以錯過,亞霍要繼續努力! 亞霍要頂住!「牆哥」,亞霍係就係好似欠少少數,不過唔該寛限下啦! 今日第一次帶女朋友嚟睇我跑馬拉松咋,俾俾面,第日至收數啦! 好,做一個sub 3俾亞霍打氣嘅人。實在疲倦,手和腳似乎是慣性的機器擺動。如果路面稍有坡度,嘿嘿!
咦,神經刀响對面線俾「牆哥」攬住喎! 唔止呀,睇佢嗰樣,面青唇白,縮下縮下咁; 緊係「牆哥」帶埋「抽官」嚟探佢啦。喂,傻佬,响咁凍天氣,「牆哥」同「抽官」又拳拳盛意,上岸啦,唔好揾命博呀! 咁驚心動魄嘅場面,亞霍又要揾片重播嘞:
剛好一星期前嘅周六,係亞霍馬拉松的最後一課備戰。亞霍在灣仔摩理臣山泳池用咗1:53:08游完5000M (100個直池)。之後,即刻搭113隧巴趕往巴富街運動場,換過跑衫褲,用了大槪個半小時跑完60個最外線 (外圈大約320M)。「牆哥」睇完亞霍呢段片,知到今日收唔到數嘞,只可以留待下次喇。
最後這幾哩路,亞霍還可以追過三幾個人! 這是以往馬拉松最後六哩未嘗過的好滋味呀! 25哩,2:48:55; 只餘一哩多些,嘿! 嘻! 哈! 雖然腳板無知覺,不過亞霍就有百分百信心: 這次一定能實現三小時內完成馬拉松的願望嘞! 腳步亦因此放慢了些許,走入運動場,終點在望,衝過終點線,大會時間2:58:21!
雨水,汗水,幾乎有埋淚水! 三小時內的馬拉松呀,大會賽後公布58人在三小時內完成! 仲有,今年大會有完成証書給參賽者呀,亞霍的第一張馬拉松証書!
呀,要提番下個傻戰友,以為佢會俾「牆哥」帶上岸。亞霍衝完線,沖埋涼,飲過杯熱朱古力,問其他隊友都話唔見傻佬喎。嗰心十五十六,死啦,係咪上咗白車呢?嘿,等咗一輪,居然見到嗰傻佬顫抖抖咁拖住「抽官」返終點! 咁傻,真係無得醫! 至於佢嘅時間就唔記得嘞(佢自己都唔記得)。
----- 廣告 Ad -----
Fitz連結: https://fitz.hk/?p=115014
更多:
Fitz Facebook專頁
[香港馬拉松史] 1983年香港第六屆國際馬拉松之sub-3夢 (上)
[香港馬拉松史] 馬拉松的目標 第三屆香港馬拉松(1980)
[香港馬拉松史] 難忘的第一個馬拉松賽事 (1979年香港馬拉松)
[香港馬拉松史] 香港長跑會 1978年的半馬拉松 (綠色半馬)
亞霍@Fitz.hk
Fitz Running 跑步