其實我細個好窮,十四五歲就出黎兼職做野,主要做清拆同裝修,好想快啲出黎做野搵錢養家。當讀左半年中六 (預科) 嘅時候,收到消防處取錄,就決定退學。

2007年夏,19歲嘅我,經過半年嘅操班生活,畢業成為一位消防員。

一出班就被兩個老總捉左入消防長跑隊。但當時我根本唔鍾意跑步,只係為左襯托下老細而出席,諗住求其跑下,影張相就閃人。

點知第一課訓練得兩個人,老總揸車接我收工,想閃都閃唔到。老總仲對住我地話:「九龍區20年未贏過,今年有潛質嘅後生仔出班係九龍區,終於有希望啦。」我聽到都已經滴汗,我諗住表現得差啲,等佢唔洗咁大期望,下次唔好再搵我。

圖: Wong Ho Chung 黃浩聰

訓練開始,由鳳園跑上九龍坑山斜路5轉,個師兄一黎就衝上斜,我心諗:「頂你,洗唔洗跑咁快,想hea跑都唔得,為左唔輸太多都要死跟。」

呢個師兄原來係同期出班,派左去荔枝角嘅「阿競」,佢就係消防學校PFA板上4800米跑到16:04,我地果屆跑得最快嘅學仔,而當時我嘅成績係17:24。可能我好細個搬水泥上落唐樓嘅關係,係斜路嘅表現唔差好遠。

跑到上山頂,老總話落斜驚我地傷腳,要我地保留體力集中練上斜,佢車我地落返山腳,重複練5次。搞到佢架車臭賓賓。

但係咁現實嘅社會中,尤其是階級觀念咁重嘅紀律部隊,我開始感覺到有一啲人情味,原來唔講工作講跑步,大家之間嘅距離可以拉近啲啲。

現時視覺

係咁嘅環境下長大嘅我,以前份人比較現實,亦都比較自我。尤其是岩岩入職,面對好大嘅工作壓力,邊有時間追求興趣,某程度上我都係因為人事同現實嘅考慮先試下跑步。但基於呢個出發點,唔算得上鍾意跑步。

待續……

(聰Sir按: 我相信運動可以改變一個人,我係一個好例子。希望透過分享自己嘅跑步故事,鼓勵人踏出第一步嘗試,會有意想不到的收穫。)

原文載於 Wong Ho Chung 黃浩聰 Facebook專頁

感謝聰Sir授權轉載


文章為作者意見,不代表Fitz立場。

歡迎投稿: http://fitz.hk/contribute/

廣告
黃浩聰 Wong Ho Chung
香港頂尖越野跑手,正職消防員,贏取的錦標不計期數。2018年以戈壁沙漠冠軍、阿他加馬沙漠、納米比亞沙漠亞軍,以及南極冠軍,奪得世界四大極地超級馬拉松巡迴賽總冠軍。