2011年9月

「魚唔過塘唔會肥,做消防員幾十年有得做,但體能教練呢個機會過左就無,年紀大左你更加唔會想。」

「無話邊個取代唔到邊個,你走左好快有人取代你。但人生係你自己嘅,你應該揀自己想行嘅路。」

老總呢幾句說話係我印象中好深刻,令我決心離開舒適區,成為消防處第十期體能教練 (PTI)。

之後我試過玩龍舟、搶包山、健身、體操…… 但都唔適合自己。我突然諗起曾經跑過比賽,於是我再次著上跑鞋,想認真跑一次。

人生第一場公開賽事,係「鑽一里」4×400米接力賽,係中環遮打花園舉行,仲有電視現場直播。來到總決賽,我代表消防長跑隊,同 PTI 師兄弟一隊,負責最後一棒。

我好重視今場比賽,等緊接棒嘅時候,心情緊張到爆燈,仲開始失去信心,亂諗野:

  • 我復出後第一場賽事一定唔衰得
  • 全世界係度睇緊我
  • 點解會安排我跑最後一棒?
  • 千祈唔好靠我追
  • 我希望我嗰隊最後一個到
  • 咁輸左都唔關我事
  • ……

結果我果隊第二個交棒到我手上,我拎住支棒,心入面好亂,諗埋好多無謂野,短短400米,都跑到亂晒,最後100米已經爆左,比人過晒,結果最後一名衝線。

攝: Foto Mo  圖: Wong Ho Chung 黃浩聰 Facebook專頁

嗰一場賽事,真係瘀到爆,我代表消防長跑隊,代表成個部門,係現場直播下,輸左。我無面目見師兄弟,亦都知道原來自己嘅潛能只係咁渺小,我唔想再累街坊,打算同師兄弟道歉,然後黯然咁離開跑步界……

我最唔甘心就係三年前無心插柳之下都跑到耀眼成績,今日有心栽花,卻已經跑唔返三年前嘅水平。唔通果段真空期真係無辦法彌補?

子威突然拍拍我膊頭:「聰,你跑得好好,人地跑短跑嫁,400米邊夠佢地鬥,如果鬥5000米就有得鬥。」我突然又領悟到,跑步嘅發展亦唔係咁窄,仲有分長短距離,短跑贏唔到可以試下跑長啲。感到有返啲希望,好,下次又試下跑長啲!

賽後,四師兄弟,坐係茶餐廳嘅卡位,第一次聽佢地講跑步話題:

  • 邊場邊場比賽
  • 走咩咩pacing
  • 場賽事走成點
  • 呀邊個邊個跑咩時間
  • 下一場比賽幾時幾時
  • ⋯⋯

我雖然完全答唔到咀,但淨係聽佢地講都覺得好有趣,原來跑步有咁多學問

佢地話嚟緊有幾場賽事隊際唔夠人,想我幫手。我覺得被重視,雖然我跑得無佢地咁快,但其實我仲可以做好啲,好想貢獻自己嘅力量,為佢地出一分力。

同三年前比較,感覺唔同左。我搵到嗰份作為跑手應有嘅使命感,呢一日之後,我覺得自己成為一位真正嘅跑手。

圖: Wong Ho Chung 黃浩聰 Facebook專頁

現時視角

三年可以測試到自己係咪一個甘於平淡嘅人。然而,我睇清楚自己唔鍾意舒適,當一定落黎,就想挑戰新嘅事物。如果當日無離開舒適區,我都唔會跑步,大概我今日會係一個捧住肚腩,非常平凡嘅人。

我本身係一個對跑步零認識嘅人,當時資訊無咁發達,連 Facebook 都未有,真係咩都唔識,逐少逐少慢慢學返黎。

我會同人講鑽一里係我跑步生涯嘅開始,因為呢場賽事之後,我先搵到作為跑手應有嘅使命感。所以我2011年24歲嘅時候先正式開始跑步,到而家跑步年資9年。

待續……

原文載於 Wong Ho Chung 黃浩聰 Facebook專頁

感謝聰Sir授權轉載

附錄: 2011年鑽一里賽事新聞報道


文章為作者意見,不代表Fitz立場。

歡迎投稿: http://fitz.hk/contribute/

黃浩聰 Wong Ho Chung
香港頂尖越野跑手,正職消防員,贏取的錦標不計期數。2018年以戈壁沙漠冠軍、阿他加馬沙漠、納米比亞沙漠亞軍,以及南極冠軍,奪得世界四大極地超級馬拉松巡迴賽總冠軍。