運動員生涯好短暫,今年,眼見好多唔同項目嘅運動員相繼退役,我又能夠做點甚麼呢?

於是係5月,炎熱嘅夏天,疫情緩和時,發起 #HK360Challenge,當時幾十人 Full Supported 幫助我環繞香港跑左360公里。

寒冷嘅冬天,嚴峻嘅疫情及緊張嘅限制措施,我選擇 Self-supported 一個人挑戰全走麥里浩徑 #FKT
其實8月嘅時候,Tony 向我提議 FKT,一齊搜集資料,並開始籌備,仲將 Strava 改埋名,搵路線進行測試。但一個突如其來嘅嚴重扭傷,當時傷到連行都行唔到,見著狀態倒退,距離目標越來越遠了,令我所有計劃同期望都落空。係10月見到小強打破衛徑紀錄時,心情真係好興奮,仲曾經一度發文宣佈挑戰麥里浩徑,但當時傷勢根本未康復,最後只能刪除貼文。

對比之下令自己更失落,因為自己想跑但跑唔到,但繼續耐心地等候,尋求朱醫師針灸治療,亦定時食骨膠原產品促進康復。慢慢地,我可以跑得返,進行咗5次50公里訓練,而10公里時間更跑出PB 34分43秒,但同時又犯下另一個低級錯誤,FKT 前5日受邀請下去踢足球,又再次整到傷患……

雖然我經常面帶笑容,但有一些壓力,有一些痛苦,只有自己才知道,或者還有太太 Viann 都知道。

我都曾經埋怨自己唔夠完美,但越野跑教識我世事沒有完美。就好似山路本身就崎嶇不平,無辦法期望好似平路一樣平坦,係山路上你每踏一步,都一定有改善空間,亦無可能係100公里路上踏出完美的每一步。更重要係用咩心態去面對唔自己完美嘅時候,如何找出當中嘅平衡,盡力將自己發揮到最好。

今次 FKT 麥里浩徑挑戰,持續幾個月的掙扎,再一次引證「你的心態如何,你的境界也必如何」,我學懂很多,感恩感恩。

原文載於 Wong Ho Chung 黃浩聰 Facebook 專頁


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 黃浩聰麥理浩徑FKT有感: 你的心態如何 你的境界也必如何