做劇烈運動必定有安全風險，頂尖如奧運會亦唔例外。《時代周刊》統計過，歷史上有5名選手於奧運比賽途中喪命，夏季奧運佔兩名。
而史上第一人於比賽時死亡嘅個案，就係葡萄牙馬拉松選手 Francisco Lázaro。
1912奧運男子馬拉松
1912年瑞典斯德哥爾摩奧運，葡萄牙第一次派員參加，Francisco 係葡萄牙5名代表其中一位，出戰男子馬拉松。
Francisco 同當時大部份運動員一樣，都係業餘性質。佢雖然係汽車工廠一名工人，不過係葡萄牙第一氣袋，曾經贏得三次全國冠軍，PB 係 2:52:08。能夠參與奧運會，Francisco 賽前表現相當有決心，佢話: 「我一係贏，一係死，無第三個選項!」
比賽當日，Francisco 跑至19英里 (約30公里) 突然暈低不醒人事，第二日喺醫院離世。
醫生發現 Francisco 昏迷時體溫高達41度，最初以為佢因為現場環境溫度太高，經鑑證後，發現Francisco 全身搽滿羊脂，目的係防曬同止汗。結果皮膚被油脂覆蓋，導致身體不能排汗及降溫，而引發中暑及脫水。
Francisco 離世震驚瑞典同葡萄牙兩國。瑞典斯德哥爾摩於奧運馬拉松賽道嘅U-turn位置，建立一座紀念碑。而葡萄牙里斯本一條街道，亦以 Francisco 命名。
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
