美國阿拉巴馬州早幾日前舉行嘅 Elkmont Half Marathon 發生一宗罕見事件，一隻由農場飼養嘅兩歲狗狗 Ludivine，有人見到佢為咗小便衝咗入賽道，然後同一班選手一齊跑。結果，佢順利完賽，仲跑出1小時32分56秒，奪得比賽第7名。
事後佢主人April透過email接受當地報章訪問，April 話佢隻狗一如往常，夜晚離開屋企周圍玩，點知第二日收到比賽大會通知。April 第一個反應，係擔心佢搞亂人哋 party，影響比賽。April 仲話佢呢隻狗平常好鬼懶，會叫佢做「Lazy Dog」。
----- 廣告 Ad -----
據講，狗狗 Ludivine 大概喺3公里左近衝入賽道。沿途同佢一齊跑嘅選手 Tim，盛讚 Ludivine，話呢隻狗狗鬥心好強，沿途差唔多無停過，只係中途停低過一次飲咗啲奶同水。結果，Tim 同 Ludivine 齊齊過終點，Tim 跑第6，Ludivine 跑第7。
Ludivine 呢個第7只係非正式名次，大會話佢唔係參賽者，唔會畀名次佢喎，但都送咗個獎牌畀佢，以示表揚。
資料: Today.com
Fitz連結: https://fitz.hk/?p=123391
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。