[橫浜馬拉松2018] 得來不易的完成牌

對於一個有練習的跑手來說，完成一個馬拉松，其實唔難
完成一個日本馬拉松，只要有錢及假期，其實唔難
但對於我來說，完成人生第一個日本馬拉松，要用多一年時間才能成功完成

我不得不承認我係有一份執著 (衰左講句呢啲可能叫 on8+1)
對於好多跑手來說，無左隻横浜馬咪跑過第二隻日本馬咪算
但對我一個好希望係某一個地方完成某一件事來說
呢啲話其實難聽過粗口

唔好意先講一堆廢話
其實好多人都問過我，點解日本咁多馬死都要揀横浜係我既初海外馬 (因為横浜馬唔係IAAF/JAAF認可賽事)

呢樣野要回帶到2015年，我第一次係日本睇演唱會，地點係横浜馬路線經過其一個地方>>神奈川県民ホール

因為呢2場演唱會，意外地初次踩上橫濱呢個地方，呢個地方比我感覺雖然好近東京，但係無東京節奏咁急咁多人，已經有一種說不出的好感

嗰陣已經得知有横浜馬拉松舉行 (當時剛好係即將舉行第一屆)
已經心想希望有機會黎跑一次，但係未有時間表
直到2016年，受到眾多跑友既影響下，開始有出外跑馬拉松呢個想法
上年横浜改左10月舉行，多左時間備戰 (加儲錢) 下
再加上我有一個無聊既想法「既然我第一次係海外加日本睇演唱會就係横浜
咁我第一個海外馬拉松都比埋横浜，咁呢一個城市對我黎講好有一份特別既意義」
終於係2017年決定報當時既第一隻海外馬

好可惜，人算不如天算
千算萬算算唔到關東一帶10月尾會打風，我既第一隻海外馬就咁樣比颱風吹走左
吹走既唔只一隻馬，連個人既信心都吹走埋
同埋一齊打算横浜成為我既海外初馬呢個願望都夢碎
原因係當時已報了台北馬拉松，結果我既初海外馬好「不幸」地比左台北
(老老豆豆我做唔到報左名唔跑咁有骨氣)
因為打擊太大操練少左，再加上賽前到比賽期間一直咳緊，最後只極差既成績完賽

呢張相攝於2017年10月29日還晶片路途上，當日横浜馬拉松取消後終點個牌都即時拆走，嗰一刻見到既心情簡直係灰上加灰

上年離開横浜既一刻已經同自已講好左今年返黎報仇
當然，直到出發前一刻，我都仲食緊驚風散，一直都好擔心歷史會重演
而且係愈近出發日仔我愈驚，當時好多報道話月尾日本打風，直到出發前幾日再睇天氣預測，見個颱風唔會影響到日本，先放下心頭大石安心期待賽事

EXPO

一如上年今年 EXPO 繼續係紅磗倉庫舉行
但係同其他日本大型馬相心
橫濱個規模唔算太大
今年我大概行左一個鐘到（主要都係影下相）
無買到野就走
佢地嗰啲 product 我覺得好一般
(大會送嗰件 tee 其實仲靚過比錢買嗰件大會tee……我覺得)

為海外跑手而設既 counter

大會發行既goods (部份)

嘉年華既舞台，當時應該係介紹緊今次條賽道（我事前已經溫左書）

比賽日

事前大家都祝福我横浜馬成功 SUB-3
老老豆豆，你估我唔想咩
不過事前既長課都操唔起個態，賽前11日既 PB RUN 半馬都係只能以個人第二快既131完賽
所以賽前都估計310左右完賽

上年同一時間我係係酒店房灰到核爆訓係度 loop 電話睇住比金沢馬洗版再灰上加灰
今年終於可以正式上戰場個感覺真係百般滋味在上頭

一反常態過住跑馬前一晚會失眠無覺好訓，今次跑馬前一晚成功唔夠11點訓左覺兼訓得著，信心都大增左

話說今次揀左間地點唔錯既酒店 (係港未來線馬車道站上面某大連鎖商務酒店，無論行去寄存行李既パシフィコ横浜，同埋拎選手包兼旅行熱點既横浜赤レンガ倉庫都好方便) 我可以行過去起點當熱身

由於要趕8點前起跑區截人上線，係A區上線既我放低行李後都嗱嗱聲去左起跑區先熱身

(題外話，唔少跑友覺得第一隻日本馬應該要好好享受唔好太在意時間，但係由於上年失去左呢隻馬，更加想今年跑馬成既話做好番個時間，所以我直頭連電話都無帶專心比賽)

最初驚頭段太快唔敢攝太前，但係呢一步我行錯左
一起步嗰下係嚴重塞人，佢既所謂A區係好多跑緊5分尾一公里 pacing 既跑手係度

頭 3K 我係咁攝位先跑到
差唔多去到横浜スタジアム我先跑番自己既披醒

就係去到横浜スタジアム呢個位，我已經要除手袖，因為出太陽嗰下開始熱，呢個溫度對我跑馬黎講……係偏熱……

頭7K係港未來區氣氛係一流，之後走落橋底係無咩人氣
幸好仲有大會邀請團體係水站表演不致於咁靜
呢個時間我都開始加速睇下自己挨到幾耐

去到磯子駅一帶又多番好多住係附近既居民打氣
甚至見識到大會點安排啲人過馬路簡直難為觀止
(真係要讚一讚啲日本人，佢地係好支持呢啲路跑比賽，等緊過馬路都不忘為跑馬打氣，如果呢啲野發生係香港既話……)

20K打後 U-TURN 位
亦即代表即將上首都高速 (亦都係呢隻馬既重點賽道)
但係對我黎講一啲都唔享受
對於一個跑過香港渣馬既香港跑手黎講，首都高速加埋附近啲貨櫃碼頭既景，完全係好有渣馬係長青隧道出黎青葵公路既感覺，我真係有種錯覺呢度係貨櫃碼頭同荔景美孚一帶

同埋條橋好多暗斜都幾伏下，少練斜路既我係呢段路都用左唔少體力，再加上天氣開始熱體力開始下降，亦都開始跌速，呢段路我係捱得好辛苦，到開始望到横浜海灣大橋先覺得就黎見家鄉

落橋經過個收費亭嗰一刻，我覺得好有那些年玩嗰隻賽車 GAME 既感覺

落左橋仲要係個貨櫃碼頭度跑多 6K 先出番去港未來區
呢度無景觀可言得個悶字，幸好大會安排左唔少應援團係度為跑手打氣，再加上有零聲市民打氣，先至無咁難捱

(令我最深刻既係35K水站竟然有可樂! 好唔客氣一野隊左2杯唔係好凍兼無咩氣既可樂，呢個時候遇到可樂簡直係沙漠中遇到清泉一L樣!)

其中一張我好鍾意既比賽相，原因係背景正正就是神奈川県民ホール

一直捱到38-39K後返番去港未來區
見番啲人流終於醒喇
個人亦都開始有啲激動
因為捱多幾K我就完夢喇

去到横浜赤レンガ倉庫今年應該係改左路，可能係之前唔足里數所以要改路兜入去?
(點解我有咁既估計呢? 我8番黎既小道消息，話說横浜馬一開波攪既時候已經搵 JAAF 量度賽道，但係最後係少左500米 JAAF 最後係唔承認呢條賽道，唔知係咪咁大會要改道令個距離正確……)
不過兜左入左個感覺差左啲，唔識點形容

其實去到最後幾K我係想搏310撻陣，轉番出去合味道紀念館 (約最後700米) 睇番時間知道機會好微，再加上最後2K大腿開始發唔到力，衝線最後幾十米我開始收步

最後幾百米衝刺

最後大會時間3:11:13 (個人3:10:28) 衝線
成積唔算太理想，但力保315呢個底線完賽我都勉強收貨

係衝線一刻，無視任何人，終點喪嗌
我嗌既……係一吐一直收埋係內心鬱成年既烏氣……
一個令我收藏左內心成年既陰影
到呢一日終於可以擺脫
我終於可以拎得番上年失去既野
我終於成功兌現番自己一年前既承諾
唔跑過横浜馬唔會報其他日本馬

呢個就係為曾經報左2017年横浜馬今年要復仇既跑手補發番上年完成牌既counter，我覺得呢個安排已經算唔錯，起碼我係真正完成到賽事先會拎番牌完成牌，否則就咁比番牌完成牌對我黎講毫無意義

特登帶埋上年條完賽毛巾同號碼布黎一齊影番張合照，仲要係跑完即場影，先有嗰份「我終於報仇成功喇」嗰份意義

我承認 PB 失敗我係有啲失望，可能性

• 練習時少練斜路
• 賽前一星期太多野預備休息不足
• 天氣熱就發揮得差
• 無再行前啲起步減低塞人機會

雖然成績唔算太理想
但係相比起上年台北馬同今年渣打比係好左好多
尾段跌速無呢2隻馬跌得咁快
同埋前半馬同後半馬相距近左

我一定要多謝一位長跑路上既伯樂—莫紫凌非妳莫屬
多謝妳拉埋我一齊長課+晨操+中間比左唔少意見我
多謝曾經陪我練過長課既安東+峰爺+租租
多謝樂華斧山既一眾師兄令我5K TEMPO 係咁 PB
多謝謎之兵團一眾巴打絲打一路 live track 我成績

呢個只係一個開始，明年渣馬會再努力尋求突破!

賽道短評

返黎香港睇番一啲馬拉松既 pages
講番横浜馬既評價好一般
同同一日舉行既金沢同水戶馬完全係比下去
呢個我就唔識比較喇
不過條賽道……老老豆豆有啲位的確係有啲悶……(尤其跑入貨櫃碼頭嗰段同埋部份跑入橋底既路段)
首段高速係呢個賽事賣點，但係有一半路程令我好有渣馬既錯覺
好彩大會安排左唔少既表演單位係賽道上為跑手打氣
起碼未至於無咩氣氛
當然氣氛最好一定係港未來區同磯子駅一帶
不過呢隻馬有個好處係少重覆路段，起碼唔會有一種無限輪迴既感覺

不過好多路段都偏窄
我呢啲前列份子 (頭300名完賽仲話自己係慢腳應該會比人打死) 都要跑左3K先跑番上前先無受塞人影響，想像唔到尾段有幾塞

難度黎講
最斜都係上首都高速嗰幾十米斜路，同埋首都高速啲暗斜有啲似青公，其他大致都係全平路，做時間既話呢隻未似係最好但都可以一試

賽道有個特色，大部份都係沿住横浜港一帶黎跑，中間經過唔少景點，10KM同15KM嗰段路相對比較悶 (資料來源: http://www.yokohamamarathon.jp/2018/course/)

當然要講補給
眾所周知大部份日本馬補給黎講可算數一數二
不過由於專心做時間我無咩點掃街兼細心留意有咩食
我記得食過既有蕉、提子乾 (食左好多)、朱古力、仲有紅豆包
係山下公園嗰個水站直頭有類似中式包點，同埋其他水站有車厘茄供應，當然嗰個時間我係唔會食
甚至3X既水站有 GEL 派，當然我又係會食番自己嗰啲先
其實補給黎講都算唔差，當然同嗰啲評價甚高既日本馬比一定比下去

大會場刊所列明水站有咩補給，我食左唔係好多款

你問我值唔值得跑横浜馬

我會話……如果有認識一下横浜市，又想跑一啲東京都外圍既馬，呢隻馬都幾值得推介

如果…….你自問係好執著一定要跑啲要有認證既馬，又或者想跑一隻好好玩既馬，咁好抱歉你地揀個第二隻日本馬

横浜市好值得大家黎觀光，如果去開東京行到爛既不妨黎觀光幾日
(利申我無收宣傳費)

最後送上我臨離開横浜前早上慢 jog 到大棧橋碼頭拍下之美景，細心留意相中有重點 (強烈推介横浜市景點之一)

P.S. 點解會係横浜跑完成個半月先出包膠文?
原因一來返黎香港之後有其他野準備 (包括毅行十卜) 無時間慢慢坐係度打字
二來……返到黎一直無意欲動筆……
直到大家跑完大阪馬之後見大家出 report，我先開始認真打番比賽既一點一滴出黎
最後太多野想寫所以好遲先出到呢篇包膠文
多謝大家用左咁多時間睇呢篇千字文!!!

Fitz連結: https://fitz.hk/?p=109576