利申：呢篇文絕對唔可以幫你脫毒 (更何況有毒唔一定要脫)。想脫毒，上網睇文係一啲用都無。
是咁的，有條疑似偽毒，自稱「單身狗」嘅朋友，問我跑步可唔可以脫毒。我雖然鍾意跑步，但對於脫毒一竅不通。咁我唯有求助於 Google 大神，用「跑步」+「單身狗」呢兩個 keyword 搵下，排頭位就係呢篇文章：
跑步如何拯救一個28年的單身狗!
成篇文其實同嗰位「28歲嘅單身狗」無關，主題只得一個，就係「如何在跑步時搭訕」。文章話，要搵到搭訕對象，不外乎幾個要點：
- 跑步時間：梗係揀多人嘅時間，唔通凌晨五點早課咩
- 跑步地點：叫人唔好去公園，因為公園只得大媽
- 話題：叫人拋吓書包，懶勁咁講下跑步術語
- 態度：唔好猴擒
我叫得做「奇文」，原因係我從來唔覺得跑步係識女仔/男仔嘅好時機。跑步係一件好個人嘅事，無端端殺個陌生人出嚟同我傾計，簡直係阻頭阻勢，恨不得佢彈開廿丈之外!
古語有云，「其實毒撚一個更開心」，獨身唔一定毒，毒與唔毒在乎自己心態。有人話夜晚跑步要避開海濱公園呢啲「高危地方」，又話要情人節搵個朋友一齊跑喎。但係我覺得，你有你「依泣」，我有我跑步，各不相干，關人隱事咩。
都係HNR有隊員夠積極，發起「單身狗發洩跑」，將脫毒化為動力，認真練跑仲有得著。
按：呢個活動並唔係正規活動，毋須付費，按此了解詳情，同時需要5分披步速。完。
Fitz Facebook 專頁
[前璡博客] 再見馬拉松
[渣打馬拉松2018] 人生中最重的一場感冒
Fitz Running 跑步
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
