Bekele退出國家奧運選拔，與Kipchoge巔峰對決再次落空

埃塞俄比亞嘅比基利 (Kenenisa Bekele) 被譽為「最接近神嘅男人」，佢2019年柏林馬拉松跑出2小時01分41秒，僅差 Eliud Kipchoge 創下嘅世界紀錄2秒。2020年4月倫敦馬拉松，Bekele 同 Eliud 承諾會同場比賽，不過因為疫情及 Bekele 傷患問題，兩大長跑巨人對決落空。

原本呢兩位跑手，有望喺東京奧運決出高下，不過 Bekele 已宣佈拒絕參加埃塞俄比亞奧運選拔賽，如果情況不變，換句話講佢將不會出戰今屆奧運。

事緣埃塞俄比亞當局，原訂5月2日於瑞士舉行選拔戰，後來因為疫情，提前一日 (5月1日) 於埃塞俄比亞首都一帶舉行35公里選拔賽。不過，Bekele 對呢場賽事有微言，覺得5月初先選拔隊員時間太倉促，而且埃塞俄比亞當局，本來係以選拔期內成績揀選代表，但後來又改為舉行選拔賽，令跑手無所適從 。結果 Bekele 就於選拔賽前夕，公開宣佈不參加選拔，期後更發表公開信，抨擊當局安排。

Bekele 係埃塞俄比亞嘅奧運獎牌希望，亦曾先後奪得三面奧運奬牌。呢次同當局不歡而散，睇怕未必有彎轉，奧運馬拉松項目亦少咗一粒巨星。

資料: Let’s Run

分享連結: