Eliud Kipchoge在2019年第四次贏得倫敦馬拉松

地面最強馬拉松跑手 Eliud Kipchoge (EK) 自今年4月倫敦馬之後,備戰10月維也納「破2」,開創人類歷史。維也納之後,EK休養生息,到12月佢先透過 Facebook 公佈已經開始長課,重新投入操練了。

咁操練為咗邊一場比賽呢? 有關方面亦公佈EK嘅作戰計劃,就係2020年EK將重返倫敦賽路,再次挑戰倫敦馬拉松。事實上,呢位肯雅跑手喺倫敦所向無敵,4度奪冠,並且於2018年以2:02:37打破場地紀錄。

當EK 10月喺維也納跑出1:59:40,佢4月去到倫敦會唔會再破世界紀錄呢?

此外,大多數人相信,EK參加倫敦馬係為東京奧運舖路。雖然EK至今仍未透露佢嘅奧運計劃,不過2016年佢都係跑完倫敦馬之後跑里約奧運,所以估計EK參加奧運呼聲甚高。

Kenenisa Bekele

Kenenisa Bekele 兩雄奧運雙遇

Eliud Kipchoge 若果參加奧運,最開心除咗一眾fans之外,相信埃塞俄比亞跑手 Kenenisa Bekele 一定好興奮。Bekele 剛剛喺9月嘅柏林馬拉松,以差世界紀錄2秒嘅2:01:41衝線。佢之後不斷向外發聲,話想同EK同場較量。

Bekele 早前已表明會參加東京奧運,如果EK一如大家估計,相信係東京奧運最令人期待嘅賽事之一 (雖然呢場比賽被逼喺北海道札幌舉行)。

資料: BBCLetsRun

張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。