五個人,五個故事,五種決心,雖然叫佢地廢青佢地會笑住認,但跑得三百公里既山海雲月,預左會傷曬返黎,歸根究底都係想問自己一個問題:可以去到幾盡?

曾有戲言說: 想環島,系那霸原地跳起咪得囖。然而七日以來,我經歷左一世都會記得既壯闊旅途,而錢唔系成日都可以換到呢種震撼的,於此我們是何其幸運。衝到返終點那霸市役所,沒有說話只有喘氣,望著徐宗同李盛擊掌大聲話「又一個島!」心入面滿滿都係感動,如果唔系水袋無水個人本身有小小 dehydrate,我可能已經流左馬尿。

 

所謂唔到水退都唔知邊個無著褲,平時出黎練跑吃飯,好難會有咩衝突,但沖繩環島講緊大量既準備,大量既不確定性,乃至大量難關,呢個就係真正見到一個人既性格。慶幸既系每個隊友都有著褲 (誤) / 都有佢地性格上發光發熱既地方,相輔相成,我地先可以完走。好想系度一一致謝:

宗B 徐匯宗 – 嗱,老老豆豆同你密友一場去過三次旅行,我知同你就肯定夾到架啦。多謝你邀請我落水,辛苦你統籌路線,督促拉筋拔罐,用有限時間爭取最大恢復,亦都堅持要一齊完成不惜改變路線,呢種風範系型既;見你跑果陣都好輕鬆,系停低先知道其實你都好辛苦好熱斜路放題吃到爆曬偈,但係又幾好玩喎,幾時下個島?

速度之鬼年少李盛 – 除了你個名充滿可塑性之外,唔知你都系一代笑匠喎。呢七日你都系睇落懶懶散散但默默跑完所有既路,有時候仲會殿後照顧落後左或者受傷既隊友,睇到你對運動好有熱誠同追求, 你啲學生都幾好彩有你呢個阿蛇帶領佢地步入田徑既世界。都係嗰句: 幾時下個島?

達仔 – 回想起09年考完會考(sorli,我知唔系你個年代)我 grad trip 都係去西門町俾sales 呃,欣賞你呢個後生仔考完 DSE 就敢去玩一鋪傑噠噠,雖然你承受既傷患比我地都多,你都咬緊牙關頂埋佢。我記得我當時就已經同 Yvonne 講:「後生仔就應該咁樣一往無前」,你忍受下我扮 old seafood 噸起個款講一次:不祈求平安順遂,但願勇氣一生相隨。 期待下個島見到更強大的你,幾時下個島?

沖繩單車之友會永遠榮譽主席 Yvonne – 由一開始就佩服你驚人既執行力,由逆走慶功飯俾徐宗問join 唔 join,不假思索就用兩日時間 confirm 曬所有野,同四個大男孩出發我知道難免要你多操心啦,除了做我地既先頭部隊,仲要應付上斜放題,同你踩一段路,我明白隨時辛苦過跑步,特別系轉入美麗海一段,果然系體能爆燈。好深刻系尾二個日你後輪爆胎,你自己系房一角播 Youtube 片自學整車,呢種獨立真係好令人佩服,幾時下個島?

容許我用一句話總結: “Success isn’t final, failure isn’t fatal, it is the courage to continue that counts” – Churchill

十條腿沖繩環島,完!

HNR 跑步團隊 Facebook 專頁

Gear support: ASICSRound The World 優遊天下

Fitz 連結: https://fitz.hk/?p=95056

更多:
Fitz Facebook專頁
[HNR沖繩環島跑] Day 7 恩納 > 那霸 累積301公里
[HNR沖繩環島跑] Day 6 美麗海水族館 > 恩納村
[HNR沖繩環島跑] Day 5 國頭村 > 古宇利大橋 > 美麗海水族館 205/360 km (56.9%)
[HNR沖繩環島跑] Day 4 名護市 > 國頭村 158/360 km (43.8%)
[HNR沖繩環島跑] Day 3 宜野座村 > 名護市 125/360 km
[HNR沖繩環島跑] Day 2 與那原町 > 宜野座村 100/360km
[HNR沖繩環島跑] Day 1 那霸市 > 南城市 48.6/360km
[HNR沖繩環島跑] Day 0 十條腿跑遊闖沖繩360km
Fitz Running 跑步


文章為作者意見,不代表Fitz立場。
歡迎投稿: http://fitz.hk/contribute/

首頁 > 運動 Sports > 跑步 Running > [HNR跑步團隊] 十條腿沖繩環島 後記