[Translantau 100] 66.5%完賽率 睡眠質素是關鍵

第二次參加100km賽事，但呢次同毅行係兩種玩法…慶幸喺感冒未清，冇乜練習既情況下，安全完賽，淨係腳趾拉傷同皮膚磨擦難頂啲之外，冇生水泡冇拗柴冇抽筋冇肚屙都真係要還神!

• 距離：104.4km+
• 攀升：5239m+
• Starter 677
• Finisher 450
• Overall rank 138

66.5%完賽率　我諗同天氣同走錯路 (慶幸冇遇到) 有好大關係，鳳凰大東等高山極之大霧，最壞情況係我盞 350 lumens BD 頭燈戴喺頭度淨係照到自己隻腳…前面一步都照唔到，用手拎住先叫睇到兩步，但一個人行實在太危險又唔熟路，好在有兩位速度差唔多既選手跟住先睇到路，山賽既 uncertainty 跑路既真係唔會明。

聽 KY LoLo sir 叮囑一定要夠訓，禮拜五一放工就衝番屋企訓左兩個鐘，跟住食個飽飯再上路，點知開賽冇諗0200就開始眼訓同肚餓…

捱左兩個幾鐘終於精神番，一路去到比賽完都好精神，非常好! 一開始同預計既時間一樣，去到 CP3 Wui Chung Chui 唔舒服要剪帶之後，我都一路一路慢落去，每個cp比自己既時間由5分鐘變10分鐘。之後自己一個由伯公坳隊上鳳凰頂500幾米垂直攀升真係 chur 過毅行任何一段! 好佩服鳳凰頂果個義工!! 喺凌晨大風大霧又咁凍既情況下幫我地打氣!!

去到 CP6 1100中午最曬最熱既時段同我講打大佬 18km 先到 CP7，真心諗住放棄，問埋大會有冇巴士番終點 (好彩係冇)，果陣打比阿宗，佢叫我行得幾多得幾多，咁唯有隊個杯麵繼續行，果陣已經跑唔郁變左毅行mode，行左幾k去到合益士多又食左個蛋丁先打大佬上昂坪。昂坪呢段唔真心行到崩潰，啲級已經斜到冇得再斜，我要手腳並用咁爬上去🤦🏽‍♂️

去到 CP7 75km 轉捩點來了，喺我休息緊之際，有位師姐帶左煲瑤柱皮蛋瘦肉粥黎support佢啲隊友，問我要唔要，幾大都話要啦，食完真係誇張，隻腳好似由 CP7 番番去 CP3 咁，冇乜攰既感覺! 可以跑得番! 仲 keep 到6，7K跑，真係超神奇，後段亦都冇前段咁攰!! 平路都跑得番，步速亦快左好多! 原本預計要差唔多25，甚至26個鐘都變得好有力追時間!

之後 CP8 去 CP9，短短9.7K，上完大東就不斷落山，一直跟住兩個鬼佬行，後段有幾K我都冇見到絲帶，但落到山腳又真係CP，唔知有冇行錯路，行左成3粒鐘! 仲要步速唔慢，原本預佢2粒鐘實趕到船啦，點知搞成咁。

去到最後一個 CP 淨番5K，諗住趕唔到船抖番10分鐘先走，點知兩個鬼佬 fill 完水就走左，我搞兩搞又搞左7，8分鐘，最後5K淨番一粒鐘，見仲有機 sub-24 決定搏一搏，跑得幾多得幾多，5K入面有3K平路同石屎路，我愈跑愈有，最後45min 5K成功番到終點!

但終點同 CP 差唔多，得幾丁友😅😅食物補給都冇人，全部自己搞掂，完實亦都冇人會同你歡呼，拍兩下手影張相比個牌就走得，只怪我太慢，不過呢個係同馬拉松差好遠既地方。

而 CP 方面黎黎去去都係果啲補給品，喺 HK100 CP7 做過三年義工既我覺得好失望😞 可能係 UTWT 系列賽既分別吧。

終於又完左一個100K，你問我幾多次我都會話跑個全馬輕鬆簡單容易過100k山賽好多!

完賽的風褸

文章連結: https://fitz.hk/?p=88635