31歲嘅田徑運動員 Lindsay Flach，第三次參加美國奧運選拔賽。呢次選拔賽佢雖然未能達標，與東京奧運無緣，但上面呢張大肚腩相片，就成為賽事焦點。而 Lindsay 嘅故事亦令人津津樂道。
Lindsay 參加過2012及2016年嘅奧運選拔，兩次都無功而還，今年佢下定決心要進軍東京奧運，如果機會落空，選拔賽就會係佢最後一戰。不過，喺選拔賽前，佢收到個喜訊，真係有喜!
----- 廣告 Ad -----
徵詢過醫生意見後，佢如常訓練。不過懷孕最初12周，佢同好多準媽媽一樣，都要經歷嚴重嘔吐。好彩佢慢慢適應，可以出戰選拔賽。
比賽當日，運動場氣溫高達40度，而佢參加嘅七項全能賽，要分兩日完成跨欄、跳高、鉛球、200米、跳遠、標槍及800米。佢為咗安胎，盡可能減少跳躍嘅動作，例如跳高、鉛球同跳遠只試跳一次，跨欄要避免跌低，最後一個項目800米，佢跑咗100米就直接退場。雖然係咁，但佢都完成7個項目，排行第15名。
Lindsay 雖然未可以喺最佳狀態比賽，但佢完全唔覺得遺憾，因為可以陀住BB參加比賽，係一個準媽媽最難忘嘅經歷。
資料: USA Today
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。