香港排總DQ五支球隊會員資格,扼殺地區球會正常發展。令公眾最憤慨,就係排總每年獲過千萬公帑資助,但審批會員資格呢類決議時竟然黑箱作業。至於呢五支被DQ球會 (葵青女子排球隊、力臻男子排球隊、仁濟排球隊、ALPS 沙灘排球會及青龍排球會),點解咁積極要成為香港排球總會? 呢個同獲取資源以發展球隊有莫大關係。

Fitz 訪問當中一支被DQ球會,佢哋話成為排總正式會員後,對推動本地排球普及,以至幫助球隊發展有相當有幫助。

推動本地排球隊普及

  • 本地球隊要先成為排總「準會員」,可列席會議但並無發言權及投票權,另外亦唔可以享有正式會員嘅資源及權利
  • 成為正式會員後,除可參與排總事務,擁有投票權及會議發言權,亦能就香港排球運動發展事務提出意見
  • 可以預期,有更多地區球隊成為排總會員,能更有效推動本地排球發展

爭取更多資源發展球隊

受訪球隊未有提及,排總會否向會員發放現金資助,不過對球隊而言,成為「正式會員」最重要就係可解決場地問題:

  • 成為排總會員後,預訂康文署體育館場地訓練時,可擁有優先權,亦可透過總會預留體育館場地
  • 非正式會員就要同一般市民一樣,例如要早上7點喺體育館門口排隊或到網上預訂
  • 成為正式會員後可申請「社區體育會計劃」資助,利用地區資源更全面推廣排球運動

受訪球隊代表話,佢哋要搵球員去場地排隊預訂場地,現時情況係要喺體育館門口「排通宵」。球員要犠牲練習時間去book場,舟車勞頓外,訓練場地亦難以預計。球員或會因工作及學習關係缺席練習,長遠影響訓練質素,影響比賽表現。

佢哋補充,康文署嘅體育場地一向都難以預訂,基本上需要通宵排隊才可預訂到場地,或者早上7時到網上申請「碰運氣」。如果呢個禮拜 book 唔到場,下個禮拜球員就要停練,或者到戶外「街場」練習。對球隊訓練絕對有影響,亦會影響教練團隊訓練規劃,令訓練質素及比賽表現難以持續維持高水平。

沙灘排球亦屬排總嘅推廣項目之一

5支球隊申請情況

該球隊亦披露5支被DQ嘅球隊,成為排總「準會員」嘅時間:

  • 青龍: 31/12/2013
  • 仁濟: 28/12/2016
  • 葵青: 29/9/2017
  • 力臻: 12/11/2017
  • Alps: 16/11/2017

5支球隊直至2019年4月先獲批成為準會員。

當時繳交文件包括: 社團註冊証明書副本、社團事務處登記之社團幹事資料、會章、準會員代表授權書、準會員代表之香港身份證副本。直至2020年12月再申請成為正式會員,經時任董事局按會章審批並獲得通過。當時繳交文件包括: 申請信、社團註冊証明及社團幹事資料。

不過,經歷咁多年嘅申請之後,今年5月佢哋同時獲排總通知,表示由「正式會員」(full member) 轉回「準會員」,再度失去上述資源同權利。

5支球隊同時表示,排總一直無解釋點解會被DQ,排總甚至對媒體嘅查詢,亦無作詳細解釋,令人有黑箱作業嘅印象。

一個獲政府每年資助1,700萬嘅機構,似乎未有滿足納稅人嘅期望,亦令關注本地體育嘅市民失望了。

見另文《香港排總DQ五支球隊會員資格,取千萬公帑可任意妄為?


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 排球 Volleyball > 排總DQ五支球隊會員資格: 點解做會員咁重要?