10大令人討厭的行山行為

字縮小字型大小。字重設字型大小。字放大字型大小。

香港山景優美，很多人喜歡到山上避靜。(圖: eric-cafe.blogspot.com)

不解釋，行山友必定明白：

大聲喧鬧，由山頂叫到落山腳：係傾緊計，唔係叫救命
食煙：好臭，又會製造垃圾，引發山火
亂丟垃圾：自己垃圾自執，最好執埋人哋亂丟嘅垃圾
餵飼野生動物：餵野豬會令自己受傷；餵馬騮會令其數量大增，而啲馬騮會越餵越惡，最後會令其他人受傷。（據香港法例，餵飼野生動物最高罰款10,000大元）
如果餵一隻馬騮罰一萬，相中呢位姐姐嘅罰款，應該夠買部歐洲車。
斬伐樹木，採摘野花：斬樹黨固然人人得而誅之，但斬咗棵樹做行山杖都係唔要得。山頭咁大，畀啲心機搵條枯枝一樣得！
污染溪澗：見《貴妃池有生魚!?》，唔單只揼垃圾，改變溪流、放生，亦會破壞河道
玩危險動作：有人為咗好玩，有人為咗呃like，鍾意爬出危險影相。你唔係Laughing Gor唔識單手爬山。有乜損傷要勞動人哋嚟救你就唔好啦
學識單手爬山先爬出懸崖呀。
塗鴉：見《不可不識嘅郊野塗鴉王》，就算嗰啲標示路線嘅布碎掛完最好拎走。有人試過跟呢啲布碎指示行畢架山，最後迷路
隨處便溺：人有三急，荒山野嶺，無辦法之下都要搵地方施肥。不過唔該唔好喺大路側邊方便，有臭味架。行入些少，搵個樹叢匿埋搞丫，唔該
阻街：我都明有時行到扯晒蝦要搵地方唞下。但係山徑嘅樓梯唔係闊，要坐唔該坐埋一二便，留言一個身位畀其他人過，好唔好？
山路狹窄，人多嘅話真係要忍讓。

山雞

十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。