山鞋甩底點解救?

一向關注山野環境嘅綠惜地球 The Green Earth，早前同越野跑手黃浩輝合作，統計由麥理浩徑收集到嘅廢物資料。據講，黃浩輝竟然喺山徑上，收集到十幾塊山鞋甩出來嘅鞋底。

一眾好事嘅山友當然第一時間問，甩出嚟嘅底，係咩牌子嘅鞋呢? 綠惜地球同黃浩輝又無提供進一步資料。大家行山時不妨留意一下，順便幫手執執垃圾啦。

行山鞋 (或任何運動鞋) 打入「冷宮」太耐，鞋底嘅膠會老化情況。到你突然之間著佢上山，鞋經過長時間嘅操勞，甩底甚為容易。

咁荒山野嶺之中遇到山鞋甩底，可以點解決?

1. 執返個鞋底

自己垃圾自己帶走，無論點樣都要執番跌出嚟嘅鞋底。而且最重要嘅，就係鞋係身上嘅保護裝備。無咗對鞋，你就少咗樣保護。對於野外安全而言，係絕對唔合格! 所以呢個甩出來嘅鞋底，只要想辦法修補，仍然有用!

2. 修補方法

要將鞋底同鞋身固定，當然要用適合物料。咁山頭之上要搵支AA膠簡直係天方夜譚 (雖然我山雞真係有朋友會帶支黃膠上山)，不過無膠水亦唔等於無辦法。

最就手嘅方法，就係拆開背囊多餘嘅繩索，將鞋底同鞋身縛實。記住，呢啲背囊繩好軟弱，好易會磨爛。所以最好方法，就係將鞋底嘅繩繞到鞋底嘅坑紋，減少佢磨損嘅機會。亦要有心理準備繩會經常被磨斷，要定時修復。

其實行山物資當中，不妨帶多一兩條膠索帶。索帶既輕便，又唔阻地方。遇上鞋甩底、背囊損壞等等情況都有用!

Fitz連結: https://fitz.hk/?p=118621