Fitz > 運動 Sports > 跑步 Running > [馬拉松大滿貫] 成都馬拉松晉升「七大」?

內地媒體《搜狐》於5月11日發表一篇名為《成都馬拉松或將成世界第七大滿貫將接受3-5年審核》,引述了「國家體育總局田徑運動管理中心社會活動部主任、中國田徑協會副秘書長」水濤講話,話喺5月14日將會召開發佈會,宣佈成都國際馬拉松,入選世界馬拉松大滿貫的候選賽事。

即係話,世界馬拉松大滿貫聯盟 (World Marathon Majors, WMM) 將對成都馬拉松進行審核考察,歷時3至5年。若成功通過審查,就有望成為全球第七大滿貫賽事。

參考筆者舊文:《[成都國際馬拉松] 夠班升級大滿貫?

新聞拆解

呢單新聞好多疑點,值得花時間同大家拆解:

1. 被冷處理

「成都馬拉松晉升為大滿貫」呢單消息,內地媒體可以話係「冷處理」,即係話無乜人提、無乜人理。而上面呢單新聞,亦只有《搜狐》發出。其他有報道嘅媒體,亦只係 copy & paste《搜狐》呢篇新聞稿。

令人奇怪嘅係,呢次係引述一位政府官員嘅說話。要知道,內地傳媒都係政府口舌,官員講嘢絕對唔可以漠視。咁係咪意味住呢位官員唔夠大粒,定係官員嘅說話唔代表官方呢,甚至乎呢單新聞係咪真有其事呢?

2. old news is so……

筆者最初喺香港某網上群組睇到呢宗新聞,原本以為佢哋翻啅舊聞。因為每隔一段時間,內地都會流出「成馬將成為大滿貫賽事」嘅消息。上次發出呢個消息喺2018年11月,咁啱又係只有《搜狐》報道

2018年《搜狐》報道

3. 誰人幫萬達叫陣?

成馬之所以成為大滿貫熱門,並非因為馬拉松口碑好,廣受歡迎,而是因為中國企業萬達集團 (成馬主辦機構) 在去年與WWM簽訂合作協議。

萬達固然希望藉晉身大滿貫來提升旗下比賽地位,但更逼切需要,可能是集團將計劃整體在香港上市。

套用返香港財經新聞嘅講法,成馬「升班」嘅消息無論係真定假,都對公司上市有利好因素。

至於搜狐同萬達有咩關係,點解每次成馬消息只係得佢報道,還望有高手可以指教。

結論

雖然呢單消息疑點重重,不過都叫做有個確實日期 (5月14日) 可以叫大家期待一下。

不過,消息確實又如何? 筆者維持之前睇法,中國馬拉松比賽有大把好過佢: 講名望有北京馬; 講口碑有廈門馬; 講受歡迎有上海馬。成馬係咪可以喺呢3、5年有足夠進步,令 WWM 可以交付終身,升佢做「七大」,仲要慢慢觀望喇。

Fitz連結: https://fitz.hk/?p=119486


更多:
Fitz Facebook 專頁
香港運動比賽時間表
Fitz Running 跑步