[香港人要自救] 7075鋁合金行山杖

由

2019-07-24

Fitz > 裝備 Gear > [香港人要自救] 7075鋁合金行山杖

上文講 Maglite電筒，有人叫我介紹行山杖。其實我呢啲上一代江湖，都只能夠講啲過時嘢。好似話行山杖咁，現今流行嘅碳纖行山杖係好輕，攜帶方便兼價錢貴 (隨時過千蚊一對)，不過就幼過筷子，見啲跑手俠士撐住上山，真係驚佢哋會斷pole。

7075鋁合金

以前我哋買行山杖，都唔會點理款式、型號，總之啱手型、高度，杖身紥實，已經好滿意。不過我哋一定會留意製造物料。我哋有人會推介「7075鋁合金」嘅行山杖。

呢種叫「7075」嘅鋁合金，以鋁同鋅結合，能防止金屬疲勞 (即係用耐咗唔會變型、折曲)，富彈性，方便打造成唔同形狀，而且重量輕。呢種金屬用於飛機結構、M16機關槍、裝甲車以及單車車架。弊病係抗腐蝕能力低，所以產品要有高質量嘅防腐涂漆。

現今碳纖維行山杖大行其道，但是碳纖昂貴，欠彈性，只要用錯方式使用，往往會令行山杖折斷。所以若然負重行遠路，或者日常行街，我都係寧願用番啲古老嘢。