我最近幾年寫得鞋評多，承蒙各單位關照小弟，往往有好嘢都即刻嗌埋我，今次 Brooks Running 俾面，邀請我去睇吓佢地閉門搞嘅產品show，去得嘅都係運動員、店家、體記同名人。
要數現場所見，好多都係偶像級人馬，包括潮人長毛占士甸峰、冧把暖男 Maverick、旺角男神店長 Frankie、跑鞋專家 Elton 同埋體記女神 Carrie 等等，每個我都有走埋去呃水吹，沾吓光。
真係要入正題嘞，當大家都以為我會用文字去推介新款跑鞋嘅話，咁你就錯嗱，依篇我重點用相片呈現現場環境同氣氛，係咪估我唔到呢? 產品方面我用相去交待，留返俾大家雪亮眼睛去判斷!
雙巨頭多年以嚟响本地運動市場紮根，深入民心就一定㗎啦，但同一季撞衫撞鞋機會就好高，你地試吓跑一場渣馬就知，男就無所謂，好似踢波足球隊咁，仲醒神，眼神流露出咦你都識貨喎，但女仕就唔同，好似去 ball 撞衫一樣，眼神流露出一種怪怪嘅感覺……
----- 廣告 Ad -----
普遍嚟講，今次筆者見到 Brooks Running 嘅產品款式，確實係内外兼備，尤其係女裝，雖然筆者我唔會著女裝，但我會「及」女，望落去好舒服，確實有一種自己風格; 若講風格，以彎刀為例，總之黑底主色調就係型，配把五顏六色彎刀就萬無一失，而三間近年就花碌碌，總之夠花就係潮，仲勁過屯門啲大媽。
選擇權在大家手上，而今次依個發佈會，會場佈置心思盡見，當我咬落粒牛丸度，側邊個PR同我講果種彈牙口感，就好似佢地對新跑鞋緩震物料一樣，跟手响側邊拎個緩震物料造嘅波扔落地彈返上嚟果吓，你已經贏咗。
----- 廣告 Ad -----
Fitz連結: https://fitz.hk/?p=125903
官塘朝偉@運動壹指禪
酷愛運動，專欄作家及實測運動產品專家，曾訓練雨僑及石天欣等藝人完成長跑賽事，最近迷上越野跑。