呢兩日越野跑界有一單鬧得熱烘烘嘅新聞，就係香港越野界選手黃浩聰本來被提名「第十四屆中國戶外金犀牛獎」三個候選人之一，但懷疑因為一封繁體字嘅「篤灰信」，指黃浩聰本人因為支持「反送中」同堅持以「香港人」身份獲提名而被取消侯選資格，主辦方更作出「嚴正聲明」，指「黃浩聰在網絡上發布損害祖國統一的言論」，彷彿外交部發言人上身，更揚言「祖國的主權和領土完整神聖不容侵犯，堅決維護祖國統一是我們每個中華人民共和國公民義不容辭的責任。國家利益高於一切!」
唔知以為「聰sir 」做左啲乜嘢咁大逆不道，睇清楚個啲所謂嘅 Facebook 「反中亂港」證據包括:「香港人，加油」就等同「港獨」同反中； 堅持以「香港人」身份接受提名就等同「分裂國家，破壞領土完整」；721 義載受傷市民就係「黑衣暴徒」。成封信都係上綱上線、以言入罪嘅誅心論，唔通以後上海運動員要講「中國上海」否則就係「上獨」；北京選手要講「中國北京」，否則就係「京獨」? 作為香港運動員嗌「香港人，加油」都係政治不正確？
一個中國搞嘅頒獎禮，提名一個香港嘅跑手本身就係統戰嘅手段，而黃浩聰接受左提名，以「香港人」嘅身份出席頒獎禮，就等同佢認同左香港係中國嘅一部份，因為一個非中國人根本無資格接受提名。如果佢最終獲獎其實係一個籠絡人心嘅最好手段，連同「聰 sir 」在港嘅支持者以至國際越野界都知聰sir 係中國選手中嘅一員猛將。可惜大陸嘅團體眼高手低，寧左勿右嘅文革式思維上哂腦，白白放棄左一個統戰嘅機會，主動將香港選手摒棄於「一國」之外。
----- 廣告 Ad -----
黃浩聰呢兩年嘅成績有目共睹：世界四大極地超馬賽事，四站中三站奪冠，成為第一個香港人成為世界冠軍；喺2019 UTMB 大放異彩，以第六名嘅成績立足國際舞台，奪得亞洲最高排名，中國大陸與日本選手均在其後。
聰sir成為世界級跑手係因為個人嘅努力、堅持、毅力而踏上國際舞台，其實力係經由公平、公開、公正嘅世界級賽事認證，係與世界級選手比拼切磋而得來嘅成就，唔需要由一個地區、一個國家內部黑箱作業式嘅獎項認受。相反，如果有一個世界級跑手得獎，係提高左「金犀牛獎」本身嘅認受性，而唔係黃浩聰無左「金犀牛獎」而損害左佢嘅國際級跑手嘅地位。就好似係馬拉松世界，中國大陸想頒個獎俾 Kipchoge 、大迫傑都無咁嘅資格，佢哋想收編呢啲世界級跑手用多多錢都做唔到。可惜，呢個道理係自認「天朝大國」，習慣左「恩主模式」嘅國度係永遠唔會明白。
一個國際級嘅運動員被一個區域性嘅獎項提名，最終因為「莫須有」嘅罪名受到杯葛，香港選手被中國大陸摒棄於國門之外，只會令香港離中國更遠，國際對黃浩聰表示同情，更加確立左中港之間嘅分隔。
聰sir立足香港，跑向世界，祝願2020年係國際舞台大放異彩，「香港人，加油」!
----- 廣告 Ad -----
