本地電訊商同手機品牌呢排不斷吹噓5G網絡，講到現代人唔用佢就過唔到日晨。而呢幾日，內地三大電訊商亦宣告，已成功喺珠穆朗瑪峰建成5G基站 (Base Station)，網絡可覆蓋整座珠峰。
綜合各方消息，「中國移動」、「中國聯通」、「中國電信」三間中國電訊商，先後於該地建設基站: 中移動共有5個: 海拔5300公尺珠峰大本營、5800公尺過渡營，共3個; 海拔6500公尺共2個; 而佢哋會採用華為提供嘅5G設備。基站建成後，訊號隨即開通，5G網絡將會覆蓋整個珠穆朗瑪峰。
----- 廣告 Ad -----
由於珠峰一帶為國家級自然保護區，唔准使用大型機器，所以基站都係以人力及犛牛搬運材料至海拔5000公尺。其後亦有12名工作人員駐守5300公尺，以維護基站正常運作。
網絡開通之後，中國電信會推出手機應用程式，用戶可24小時以360度VR模式，觀賞珠峰大本營，以及絨布寺嘅景色。問題係，花咁多人力物力，如果只係為咗隔住個 mon 睇風景，值得咩?
Fitz 編輯部
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。