ASICS有新跑鞋唔出奇，但講到明針對素食跑步者，就真係令小編好奇要睇多兩眼。
2015年第四季推出嘅新款跑鞋「Gel Lyte V」，講到明「無殘忍 Cruelty-Free」，大力標榜純素食主義Veganism，製鞋原料不使用動物皮，而係採用人造皮及仿麂皮為鞋做鞋嘅主體，再搭配環保的網孔同橡膠設計。
所謂Veganism，指嘅係一種理念、一種生活方式，主張盡可能地避免對動物嘅各種壓榨、虐待，包括將動物用作食物、皮革飾物等等；再進一步嘅話，就係提倡開發並使用非動物製品作為替代，從而營造更好嘅環境。
ASICS今年推出嘅「Gel Lyte V Vegan Pack」，有黑/棕褐、深藍/酒紅、全黑三款，咁唔用動物皮做鞋，會唔會影響功能？根據報導話，人造原料更加透氣，並且非常舒服耐用，實際係點真係要試過先知。
除咗ASICS，其實New Balance、Brooks等等品牌，都有推出以Vegan為理念嘅跑鞋，下次買新跑鞋時，不妨留意下！
資料來源：suiis素易, sneakernews, vegankicks.com
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。