每年總會見到幾個 post，係關於再生能源去露營點睇 (太陽能居多)，今次分享下老hike點睇再生能源去露營。
户外用得著嘅再生能源裝置當見有: 太陽能板、柴火發電、水力發電、風力發電等
太陽能板
----- 廣告 Ad -----
太陽能係靠太陽光內嘅輻射，透過太陽熱能集熱器，經過光電轉換將太陽光中包含嘅能量轉化為電能。
一般會用W (watt) 黎表示計算單位。簡化件事，w越高，充電速度越快，同時越重。
選擇一塊太陽能板，除咗睇W，仲要睇「轉換效率」，一般户外用15-22%左右，如果話你聽有25%以上，打俾消委會啦or打俾科研局。
至於幾多W先夠，要睇好多因素:天氣、輪出率、叉電線等，
經驗話我知，最少14w先有效果。
另外唔好用有內設鋰電的，因為會叉下停下，又會受熱。導致鋰電會膨漲，嚴重仲會爆炸！更加唔好直入電話，因為電壓唔穩定(可能本身出到1.8A因為有雲降到0.3A之後又上返1.8A) 燒埋底板真係恭喜你。
另外因為會長曬關係，要注意 IPX 系數同太陽能板的外殼用咩物料制造。
----- 廣告 Ad -----
柴火發電
利用柴火產生的熱能轉化成電能。
可以一邊生火煮飯/取暖，另一邊做充電。
好處係一物多用，可惜一般轉換效率比較差，當緊急用好了。
選購時要注意重量，同當柴火爐揀好了，發電係 bonus。
水力發電
利用水流的動力轉化為電力。
將發電機安裝喺溪澗旁邊，再將水流引進渦輪，水力推動渦輪旋轉而產生電力。
水力發電係一個又環保，又高效能 (轉換效率好高)，仲可以24小時運作。但……首先都要搵條澗出黎，比上面兩隻就無咁方便了。
一般係要靠叉個內設電，所以內設容量都比較重要，同樣地，重量都係成正比。市場上更有同時設用水力及太陽能/風力兩用的裝備，方便任何地型都可以用得著。
----- 廣告 Ad -----
風力發電
利用自然風的動力轉化為電力。
將發電機安裝喺當風位，只要有足夠風力就會產生電力。
風力發電嘅轉換比率唔係咁理想，但因為24小時運作，又比較無視地型，所以就算低，都叫好用。
另因為發電機會喺當風位，所以加固係好重要，IPX 又係重點，另外最好選擇有燈的，因為入夜都唔會收，睇唔到就危險。
最後，如果兩日計，一個10,000mAh尿袋，以重量計算，絕對比以上優勝，輸出力更好，三日計，用20,000mAh就55波，但三日以上，再生能源優勝，自己衡量需要去選擇 gear 吧。
