每年總會見到幾個 post,係關於再生能源去露營點睇 (太陽能居多),今次分享下老hike點睇再生能源去露營。

户外用得著嘅再生能源裝置當見有: 太陽能板、柴火發電、水力發電、風力發電等

太陽能板

太陽能係靠太陽光內嘅輻射,透過太陽熱能集熱器,經過光電轉換將太陽光中包含嘅能量轉化為電能。

一般會用W (watt) 黎表示計算單位。簡化件事,w越高,充電速度越快,同時越重。

選擇一塊太陽能板,除咗睇W,仲要睇「轉換效率」,一般户外用15-22%左右,如果話你聽有25%以上,打俾消委會啦or打俾科研局。

至於幾多W先夠,要睇好多因素:天氣、輪出率、叉電線等,

經驗話我知,最少14w先有效果。

另外唔好用有內設鋰電的,因為會叉下停下,又會受熱。導致鋰電會膨漲,嚴重仲會爆炸!更加唔好直入電話,因為電壓唔穩定(可能本身出到1.8A因為有雲降到0.3A之後又上返1.8A) 燒埋底板真係恭喜你。

另外因為會長曬關係,要注意 IPX 系數同太陽能板的外殼用咩物料制造。

柴火發電

利用柴火產生的熱能轉化成電能。

可以一邊生火煮飯/取暖,另一邊做充電。

好處係一物多用,可惜一般轉換效率比較差,當緊急用好了。

選購時要注意重量,同當柴火爐揀好了,發電係 bonus。

水力發電

利用水流的動力轉化為電力。

將發電機安裝喺溪澗旁邊,再將水流引進渦輪,水力推動渦輪旋轉而產生電力。

水力發電係一個又環保,又高效能 (轉換效率好高),仲可以24小時運作。但……首先都要搵條澗出黎,比上面兩隻就無咁方便了。

一般係要靠叉個內設電,所以內設容量都比較重要,同樣地,重量都係成正比。市場上更有同時設用水力及太陽能/風力兩用的裝備,方便任何地型都可以用得著。

風力發電

利用自然風的動力轉化為電力。

將發電機安裝喺當風位,只要有足夠風力就會產生電力。

風力發電嘅轉換比率唔係咁理想,但因為24小時運作,又比較無視地型,所以就算低,都叫好用。

另因為發電機會喺當風位,所以加固係好重要,IPX 又係重點,另外最好選擇有燈的,因為入夜都唔會收,睇唔到就危險。

最後,如果兩日計,一個10,000mAh尿袋,以重量計算,絕對比以上優勝,輸出力更好,三日計,用20,000mAh就55波,但三日以上,再生能源優勝,自己衡量需要去選擇 gear 吧。

老hike都去camp Facebook專頁
老hike都去camp 網站


文章為作者意見,不代表Fitz立場。

歡迎投稿: http://fitz.hk/contribute/

老hike都去camp
80後老hike一名 對行山、露營有少許認識 Msr fans,極憎nh(世界第一) 為人暴躁,仇口多,方向感差,對攝影、電子科技係屬垃圾級別