最近好多朋友問我，喂Max～～～點解你踩單車仲要拍埋片咁好心機，我既回應都係以下三個原因:
- Hardsell 下自己多年來都認為好好聽既冷門歌
- 比當日有一齊踩單車既朋友睇返圍爐自high下
- 同旅行一樣每個地點 (路線) 都有段影片紀錄
喺唔同既影片當中，呢三段路係特別深感受。
澳景路 + 沙田坳 + 飛鵝山「東九三斜」
第一段係澳景路+沙田坳道+飛鵝山… 稱為「東九三斜」
----- 廣告 Ad -----
當年初次踩單車，車友們大多會提及東九有三大斜路，新手就先練好澳景路，澳景路可以一腳到頂唔落地，就可以試踩飛鵝山，最後就挑戰九龍斜路中既大佬 – 沙田坳道。
拍攝當日本來只係想踩沙田坳道 + 飛鵝山，踩到中途突然有個想法，不如一日踩晒三條斜路，就先經秀茂坪過藍田入澳景路，原路出再經觀塘法院去啟業食個常餐，補給好先踩埋餘下既沙田坳道同飛鵝山，因為唔想令對腳太大負擔，所以今次挑戰，尤其是行沙田坳道並沒有經1:5斜度的聖母醫院上，而係經慈雲山道上，好快就順利都係一腳到扎山道停車場完成。覆幾個 whatsapp 同影張相就落去彩輝村買水補給，果一刻其實有想過不如返屋企，係咪有啲累的確有，但一想到難得已經踩左澳景路同沙田坳道，唔踩埋個飛鵝會後悔……結果就頂埋佢，左轉左上去經德望學校上飛鵝山道入口，踩到去豪宅區，見到一位踩 MTB 的師兄，就一齊吹水踩上去。
呢位師兄既出現好重要，因為去到中段同後段，心跳一直都係維持在160以上，大家有少少競賽感覺。即係迫到自己都無得因為已經踩左咁耐而 hea 住踩埋佢算，所以一見到最後基維爾既路牌，就有啲興奮，因為對上一次一日踩晒「東九三斜」已經係6年前，仲要晚上更舒服咁踩，當踩完後，就直落到彩虹上 MTR 回家了。
大佛全記錄
第二段係個個單車仔都怕怕既大佛，因為提及到斜路。多年來都聽到話先踩到大帽山同飛鵝山唔知要幾多轉先好去踩大佛。而有時同家人去大澳行下時搭車見到條東涌道，都會同太太講自己未減到一定既磅數係唔會踩呢度。但點解最後都去左呢度踩，一切都要從 whatsapp 對話講起。
話說車友A就提意不如踩個大冷，我過岩岩兩日前先踩完有冇第二度。車友B就話踩大佛，我就 send 左張「你大我呀.JPG」出黎，點知車友B真係話踩咪踩，怕你丫! 就係咁簡單既鬥氣，再加多個車友C出埋黎食花生，就成就左今次本住推車就推車既想法去面對「大佛之旅」。
事後感想
由東涌 MTR 到東涌道，都已經有心理準備，要踩好耐先到頂。一開波時一路 mon 住心跳一路上，踩到好似見fb 啲人影相果啲旁邊係石板牆時，以為到頂……仆你個街仲有既，好再頂硬上。見到第二幅石板牆，又以為到頂可以停一停，原來又係未到，之後再望下心跳，已經上到接近170，都打算再頂多次呢啲 z形既斜路，再見唔到頂就做死死氣推車，之後旁邊有個阿叔踩 MTB 過我，我問佢到頂未丫? 佢話到啦，再望一望前面，真係見到有唔少車友係伯公坳影相，即係好似踩飛鵝見到基維爾個牌一樣，就黎到頂。上到去，即刻去伯公坳果度影張相先!
之後就直落到梅窩，原來中途都有啲似澳景路斜路。有班外籍山友係旁邊叫加油，到梅窩前啲 rolling 路都難度唔大，盡量代入平時踩開既斜路同心跳咁上落斜。去到梅窩終於食早餐，之後就出發，話先去大佛再去大澳，會順路啲。咁就踩啦…… 又有一段長既 1:10 同 1:8……到轉入大佛條分差路，又有車友打氣話＋油! 我問佢地係咪踩埋呢條斜就到大佛，佢地話係，心裡面有少少暗爽，因為控制心跳方面都 ok，雖然曬到仆街，個 Garmin show 到個溫度高達36度，車友A無晒水仲可以分啲比佢添，不過眼見最後一條斜，就頂埋佢啦!
----- 廣告 Ad -----
踩到昂坪巴士站，因為只係去過一次放航拍機……平時見啲車友影大佛都係係個市集影，以為係市集後仲有斜大斜要上……就問對頭按梗電話既師兄，係咪到大佛啦? 佢話係，我問佢係仲有條斜上定已經踩晒啦? 佢話恭喜你丫師兄你踩完啦! 我即刻大大聲 yeah 出黎話由一腳東涌道到梅窩踩上黎都係一腳! 附近啲人都話勁丫肥仔!
之後係昂坪市集飲左枝檸檬cc，平時已經轉左飲水。不過今次飲呢枝肥仔水都ok la……之後就踩去大澳食野，食野時都有想過不如call車返東涌算。不過最後都係選擇迎接最後一條斜路，就係由大澳踩返去東涌 MTR。其實就係大澳巴士路線，可以話係除左一開始既東涌道外，最辛苦既路線。
因為太陽光正正對到正自己，由大澳到上東涌道前啲暗斜上落都唔短，又熱，所以見到條東涌道，就回想返一開始落左幾耐斜路。答案係都落左幾耐下。成程咩姿勢都有轉過，除左搖車……又係好似一開始咁，以為到，點知原來未到，又係重覆左幾次z形上斜，最後仲要大大個牌 1:6 斜路棟係度，真係百般滋味在心頭。不過見到佢地同我揮手，已經拎定電話幫我影最後一腳，就谷多一啖氣踩埋佢。車友A問我係咪一腳上，我已經唔講野，點頭話係算。佢地話以為要等我好耐，車友B話佢都有停，我第一句同佢講既係。
你大我丫! XDDDDDD
總結，全程唔計係個頂等齊人先落斜，所有斜路都係一腳上，無落過地。最辛苦係東涌 MTR 上東涌道，同埋最後由大澳返東涌道。反而大佛無咁甘。同埋要嚴控心跳，克服對未知幾時到頂既恐懼。唔好形住邊個邊個車友話都要分腳上，慢唔緊要，堅持要一腳上……咁就得左。
沙田坳道
第三後就唔打太多字，重點都係由聖母醫院踩上到沙田坳道前段的 1:5 斜路，雖然沙田坳道比飛鵝山短，但不同飛鵝山中段有回氣位。
最後不厭其煩提多次:
踩單車目的係安全回家，道理同受傷往往都同時係自己身上
與其落斜衝到60，不如安全踩到60歲，祝大家出入平安
今次大概文字分享到呢度，有興趣聽下歌同時睇下單車片段。
可以訂閱小弟的 Youtube Channel Max Wong
----- 廣告 Ad -----
