山野無痕 leave no trace，當然係愛護郊野嘅朋友所追求嘅目標，不過點樣先算係真正嘅「山野無痕」，多年來都係爭議不休。最近有研究指，攀石用嘅「攀石粉」(climbing chalk) 所含成份會殺死懸崖植物，惹起不少爭議。
攀石粉影響岩石酸醶度
瑞士蘇黎世應用科技大學，有生態專家發表研究報告，指攀石粉令岩石及泥土變得鹼性，阻礙懸崖上嘅苔蘚與蕨類植物生長。一般攀岩運動員使用嘅攀石粉，含有元素「鎂」(magnesium)，可為雙手提供摩擦力，但同時鎂亦會影響泥土酸鹼值，「污染」周圍環境。研究人員就係喺瑞士幾條熱門攀石路線，發現泥土「偏鹼」，而附近植物嘅生長情況亦較差。
研究人員建議，攀石運動員停用含有鎂嘅攀石粉，改為採用帶有黏性嘅樹脂。
----- 廣告 Ad -----
爭議一直存在
本身係攀岩運動員嘅生態學者 Andrea Holzschuh，多年前亦發表過調查報告，佢針對22種於懸崖生長嘅動植物進行研究，發現攀石運動或多或少會影響該處生態：
- 攀石會破壞懸崖表面，令某些動物不能依附於峭壁而行 (例如蝸牛)
- 攀石運動嘅裝備，如安全扣或繩索，可能會破壞植物，殺死動物
- 攀石粉帶有化學成份，會污染泥土
- 熱門嘅攀石路線，而嚇走動物
Holzschuh 亦承認生態與攀石運動各有重要性，難以取得平衡。佢而家致力同各國攀石隊合作，以求不阻礙攀石運動發展之餘，與生態保育取得平衡。
永誠
講求綠色、環保、天然的健康生活。推廣新一代健康生活文化。