世上最寒冷馬拉松．俄羅斯教師零下53度3小時22分完賽

世上最寒冷嘅賽事，並唔係咩南極同北極超馬，而係俄羅斯遠東薩哈共和國 (Yakutia) 城鎮奧伊米亞康 (Oymyakon) 舉行嘅馬拉松。早幾日，當地舉行每年一度嘅馬拉松，65名來自俄羅斯、美國，甚至阿聯酋嘅選手，喺零下53度下比賽。佢哋都要著住又厚又重嘅衣物包裏全身，幾個鐘頭比賽，臉部水氣都結成冰霜。

結果，俄羅斯教師 Vasily Lukin 以3小時22分成為男子組冠軍，而女子組冠軍就由本地人 Marina Sedalischeva 以4小時9分贏得。

各組別冠軍均有大約 $1288 美元獎金，而全部參加者嘅完賽獎品，就係齊齊衝落溫泉暖身。其實舉行馬拉松嘅奧伊米亞康，位處北半球氣溫最低地區，被稱為「冷極」，每年最凍幾日氣溫低至零下70度。不過，村莊有個長年有熱水湧出嘅溫泉，係呢度地標。而呢場馬拉松比賽就以浸溫泉做獎品，可以話相當體貼。