加洲一名男子最近實行一個「生肉實驗」Raw Meat Experiment，仲將過程每日喺社交平台報告，引起唔少討論。
呢名男子做呢項「實驗」嘅目的，係覺得現今世界充斥加工食物，食到人類唔再健康，佢決定索性唔再飪煮任何食物，一日三餐將「生勾勾」嘅食物啪入口，直到畀細菌殺死為止 (until I die from bacteria)。
「實驗」進行至今超過77日，睇佢嘅IG最常見都係生嘅牛扒同生嘅魚柳，飲品通常係牛奶以及生雞蛋。最嚇人嘅就係佢食過生嘅羊睪丸。
生食羊睪丸
男子於訪問中透露，佢之前係素食者，有日佢問自己:「點解人類係地球上唯一種要煮熟食物嘅生物呢?」加上佢對加工食物嘅痛恨，就決定轉食生肉。
不過要留意嘅，就係佢呢77日都未交待過佢嘅身體狀況，雖然喺IG未見過佢食生豬肉，不過生牛扒生魚柳甚至生雞蛋，都極有可能留有細菌，你話佢無試過肚痛肚屙，就一定無人信。
----- 廣告 Ad -----
在 Instagram 查看這則貼文
再講遠啲，用火煮熟食物呢個行為，係人類進化史上一大突破。除咗熟食可避免食物中毒，令人類壽命更長，煮熟後嘅食物較容易令身體吸收營養 (特別係蛋白質)，加速人類進化速度，令人踏上文明之路。呢名男子反其道而行，萬一因為食生肉而犠牲性命，絕對係「達爾文獎」嘅大熱人選。
資料: Indy100
永誠
講求綠色、環保、天然的健康生活。推廣新一代健康生活文化。