維多利亞公園
立法會議員何君堯及梁美芬，話要令香港人接受更多「歷史教育」，提議將公眾遊樂場地以中國傑出人物命名。提議人物包括歷史民族英雄，如岳飛、文天祥、孫中山，以至現代傑出中國人，如李小龍、金庸、鍾南山、楊利偉，甚至係傑出運動員，如李麗珊、張家朗、李慧詩、傅家俊等，都可以成為公園名稱。
事實上，正如文化體育及旅遊局副局長劉震所講，全港接近1,600個公園，絕大多數按公園所在嘅街道或地點命名，例如「青山公路六咪花園」、「光板田村休憩處」，市民一睇名稱就知道公園所在地，十分方便。將公園用歷史人物命名，反而令人產生混亂。(見下面網上改圖)
在 Instagram 查看這則貼文
翻查康文署網頁，全港眾多遊樂設施及休憩處，只有幾個地方用歷史人物命名，用佢哋嘅名亦有充份理由。
維多利亞公園
維園內的女王銅像
----- 廣告 Ad -----
港島面積最大公園，以維多利亞女皇 (Queen Victoria) 命名。維多利亞女皇為香港開埠時期嘅女皇，除咗維園，維多利亞港、域多利道 (Victoria Road) 都以佢命名。
卜公花園
位於上環太平山街附近，紀念1898至1903年港督卜力。當時中上環半山發生鼠疫，政府清拆呢一帶嘅民居，撤離居民。為咗紀念呢位港督消滅鼠疫嘅功績，將清拆後嘅空地建成公園，就以佢命名。
佐治五世紀念公園
位於官涌的九龍佐治五世紀念公園
香港佐治五世紀念公園位於西營盤，九龍佐治五世紀念公園位於官涌，同樣紀念1936年駕崩嘅英王佐治五世。
摩士公園
----- 廣告 Ad -----
黃大仙區最大型公園，於1967年10月落成。摩士全稱為 Sir Arthur Morse，為二戰前後香港上海滙豐銀行主席，亦為行政局非官方議員。摩士爵士在日軍佔領期間留守香港，並為戰後香港重建有極大貢獻。
中山紀念公園
位於上環海濱，紀念中華民國國父孫中山。孫中山先生在革命時期，喺中上環一帶生活，政府建立「中山史蹟徑」，連結十多個革命遺蹟。中山紀念公園係紀念佢對中國嘅貢獻。
邱德根公園
位於屯門新墟，公園原為邱德根公司遠東發展私人擁有，後交由康文署管理，源用公園舊名，以免引起市民混亂。邱德根為本港銀行家及地產商，曾購入荔園及亞洲電視，人稱「亞視之父」。
