法國百年品牌 Julbo 的獨門黑科技 | Julbo RX 可配度數太陽眼鏡

Fitz 編輯部 2024-05-01

早前法國太陽眼鏡品牌 Julbo 代表訪港，Fitz 有幸獲得香港代理 Above the Clouds 邀請，與非常熟悉產品的 Barnabé Grison 傾談了個多小時。今次訪問主題是 Julbo RX 可配度數系列，但原來在先進光學科技的背後，有一個可歌可泣的品牌故事。

Barnabé Grison

甚麼是 Julbo RX?

重要嘢講先: 今次要介紹的 Julbo RX，係 Julbo 近年於歐洲推出的嶄新技術，患有近視、遠視、散光等的用家，將度數資料交給 Julbo 後，法國總部定製出一副有度數的太陽眼鏡，最後再交到眼鏡店或客戶手上；多得香港代理努力，香港剛剛在五月也推出了此服務。(見下面介紹)

聽到呢度，包括我在內嘅 laymen 會問:「RX 有幾特別? 同普通配眼鏡有咩分別?」

Barnabé:「首先，我們不是簡單訂製鏡片及眼鏡框，由於我們希望所有用家都能享受到 Julbo 太陽眼鏡的好處，所以有度數 (RX) 的部份，是無縫地、完美地與本身鏡片融為一體。」

聽到一頭霧水? 可以睇睇下圖:

見到鏡片中間，好似有多一層鏡片? 佢就係 RX 有度數部份，Julbo 英文嘅形容係 Mono-lenses with “inserts”，由法國總部 RX Lab 精密儀器加上人手處理，原塊生產。RX 科技仲可以應用喺 Base 6 及 Base 8 等日常眼鏡款式 (見下圖)，基本上 Julbo 80% 款式都係 RX-friendly，但重中之重都係一眾運動款式嘅應用 (如 Density、Edge、Fury 等）。

「點解唔做到覆蓋全塊鏡片?」

Barnabé:「第一，技術上不可行，以現今科技及工藝，可能仲要5至7年時間先有機會做到；第二，根本唔需要，因為以而家 RX 覆蓋到嘅範圍，已做到視線100%清晰、零變形、零扭曲等。事實上，Julbo 的的 RX 有度數鏡片，比其他品牌最少大30%。」

「搵其他公司代工生產?」

Barnabé:「做到咁大面積、彎曲兼有度數嘅鏡片，全球暫時只有 Julbo 的 RX Lab。」

獨門黑科技

講到光學與獨門科技，自然會聯想高端晶片。近年大家才發現，能夠掌握生產晶片最頂尖技術嘅公司，原來全球只得台積電 (TSMC)；能生產光刻機的，全球亦只得荷蘭 ASML (強如日本也做不到)。要追上佢哋，唔係單靠金錢就能做到，而係要不停累積經驗、知識才有可能 (更加莫講台積電/ASML也會不斷進步)。

晶片與運動太陽眼鏡，當然不能相提並論，況且 RX 是相對更狹窄的領域；但不要忘記，我們今日輕易就能得到眼鏡和鏡片，其實技術含量也相當高。

Barnabé:「我們法國總部得 RX LAB，暫時每年生產約15,000副 Julbo RX 太陽眼鏡 (即有度數太陽眼鏡)，年產能最多可增至30,000副左右。香港及亞洲區將來可訂製的 RX 系列，都會是由法國生產及寄出。」

「成本不是會很高? 可以喺亞洲開設一個生產基地? 」

Barnabé:「我們的確有此打算，並與合作了三十多年的台灣廠商探討可能性，最後得到的回覆是:『我們做不到。就算技術上能勉強應付，但需要投入的資源與成本，與市場規模 (運動太陽眼鏡) 不成正比，所以不可行。』

雖然如此，但我們並不急於擴展，做好研發與生產，才是 Julbo 最關注的事。」

真的嗎? 在這個年頭，竟然有公司不急於做大生意，只 focus on 做好產品? 難怪 Julbo 有咁多捧場客。

在 Instagram 查看這則貼文

Kilian Jornet（@kilianjornet）分享的貼文

K神 Kilian Jornet 本身不是 Julbo 贊助運動員，但 IG 都會見到佢戴住 Julbo 做運動

Julbo RX 小資料

100% Julbo 主理
Julbo 鏡框、鏡片相容
鏡片可配度數
法國製造

香港合作眼鏡店: 目匠 Lumic

地址: 荃灣大河道100號海之戀商場1054號舖
營業時間: 星期一至日10:30-21:00
Facebook | Instagram

135年的法國品牌

唔少人都覺得法國人「好Hea」、「唔願做」，但換個角度睇，呢個亦係反映佢哋對生活質素嘅追求，寧願「做少啲」也不願妥協，產品生產亦如是。問 Barnabé Julbo 的發展大計，佢叫我先打開 Google Map，search 下 Julbo 法國總部:

無錯， Barnabé 就係喺上面嘅 office 返工，呢度亦係 RX Lab 嘅所在地。事實上，除咗海外市場嘅 marketing 同事，Julbo 公司上下約200人，都係喺法國山區城鎮 Longchaumois 生活及工作。拉大少少地圖，Julbo 位處嘅 Jura 區，其實係法國眼鏡業發源地，區內曾經有幾百間眼鏡企業，不少仍然營運。

「Julbo 創辦人百幾年前創業起家嘅小屋，而家仲喺我哋總部旁邊。公司雖然已經由第二代帶領，但經營理念從未變過。喺 Jura 區出生嘅創辦人 Jules Beaud，當日收到來自沙慕尼嘅水晶採集者 (The Crystal Hunters of Chamonix) 要求，開發能夠保護眼晴嘅太陽眼鏡，從此開展 Julbo 事業。」

「Julbo 係一個家族傳承生意，以保護用家眼晴為己任。」

既然已有市場上最好嘅產品，又何必要為爭逐更大利潤而去量產，影響產品質素? Julbo 與跨國大品牌的分別，可以從鏡片選材睇到。Barnabé 話，現時市面99%運動太陽眼鏡，都係採用「聚碳酸酯」 PC鏡片 (PolyCarbonate) ，原因莫過於成本較平，亦適合使用機器大量生產。至於 Julbo 的太陽眼鏡，絕大部份都係採用可變色鏡片 (Julbo 稱之為 REACTIV Photochromic lenses)，成本是 PC 鏡片幾倍，換來嘅係更輕量嘅產品、更清晰嘅視線。

「Julbo 從依視路 (Essilor) 採購完鏡片，會加入自家研發技術，單單一塊鏡片就已經有11層塗層。喺 Julbo 法國工場，每塊鏡片都係用機器放入焗爐烤製，比機械量產出來鏡片更堅韌，良率也更高。」

睇 Julbo 宣傳短片，經常會帶出一個 message:「視力不佳動搖信心」(Poor vision shakes confidence)。事實上，在極限運動領域，例如高山滑雪，哪怕是半秒的分別，「看得清」與「看不清」足以影響生死。不惜增加成本使用變色鏡片，研發 RX 科技提供有度數鏡片，背後理念都係一樣: 在任何環境下，以最快時間給用家最清晰的視覺。