喺度介紹一下我自己先，同埋分享下關於我嘅經歷，同埋我黎緊嘅計劃。
你好，我全名叫李鈺翰 (Marco)。今年24歲，我係一個土生土長嘅香港人。
我自細以黎嘅性格就比較怕羞，但係同時間我由細到大都係一個好鍾意做運動嘅人，所以畀人感覺係一個好外向嘅人。雖然會比較怕羞，但係同身邊嘅人熟絡咗就會好多嘢講。我自己特別鍾意一啲可以接觸到大自然嘅運動，就例如行山、跑步、攀登等等。我亦都係一個好鍾意接受唔同挑戰嘅人，不論喺生活上或者喺運動上，都會迎難而上，唔會輕易放棄。
我喺小學嘅時候就已經開始參加一啲校外嘅歷奇活動喇。自從第一次接觸咗大自然就愛上咗，之後就開始去行香港唔同嘅山，慢慢接觸好多唔同登山嘅活動。我自己由細個接觸到登山呢項運動嘅時候，就一直都好想登上世界嘅最高峰——珠穆朗瑪峰 (Everest)。我相信呢個係登山界入面，好多人都視之為最終嘅目標。後來我發現全世界原來有 14 座高達 8000 米嘅山峰，咁我就產生咗一個更加大膽嘅想法：希望自己可以喺有生之年，能夠完成晒 14 座 8000 米嘅高峰。
我獨自去登峰
喺今年4月25號，我一個人參加咗當地探險公司嘅團隊，一共20人出發去了尼泊爾，進行呢個一共為期20日島峰 (Island Peak) 嘅旅程，作為出發首座 8000 米山峰的前哨戰。
但喺 20 日嘅過程當中都非常之唔簡單，我哋需要面對各種難題。喺呢個旅程開始嘅時候，我都係抱住一種平常心面對，但係旅程嘅啱啱開始，已經迎來好多唔同嘅挑戰。
喺旅程嘅第二日，我地搭小型飛機到三面環山，被譽為「世上最險要機場」 Lukla (Ramechhap Airport)，然後徒步 3-4 個鐘到 Phakding (2,610m) 。我地喺 Phakding 留宿一晚，當時嘅我仲感覺到自己狀態很佳。喺第二朝早起身嘅時候，我開始感覺到有少少頭痛。喺前一晚，我哋嘅登山嚮導都有提我哋需要食預防高山症嘅藥物，而我都已經按照嚮導嘅指示食咗藥，但惡夢就係呢一日開始發生。
喺第三日，我哋出發徒步去到 Namche Bazar (3,440m)。我哋行得好快，比我哋預期需要嘅時間快咗兩個鐘。當我哋到達咗 Namche Bazar 嘅時候，我感覺到有一陣好強烈嘅頭痛，比起尋日更加痛。喺呢一刻我就知道，我好大機會係高山症發作。但係嗰陣強烈嘅頭痛好快輕輕咁帶過咗，其他隊員都同樣輕微感到各種身體不適。嚮導曾經同我哋講過，如果有少量嘅身體不適係正常，因為身體啱啱達到高海拔位置，需要一些時間適應，唔需要過分嘅擔心，休息多啲、飲多返啲水就會冇事，所以當時我冇太介意，休息過後就繼續我哋嘅旅程。
之後嘅日子，我們一路好快沿途走過 Dole (4,200m)、Machhermo (4,470m)、Gokyo (4,800m)，然後再到達 Thagnak (4,700m) 休息一天，為明天我們將會出發去 Cho La Pass (5,367m) 作準備。
高山反應
喺呢一天休息嘅晚上，就係惡夢真正嘅開始。因為我哋明天需要 7-8 小時由 Thagnak 出發去 Cho La Pass，然後再落山去 Dzongla (4,830m)，所以需要凌晨 3:00 嘅時間起身出發。但休息嘅當晚，喺我食完晚餐、正準備打算走返去自己間房休息嘅時候，再次感到好強烈嘅頭痛，同埋好想作嘔，突然感覺到全身軟弱無力，當時覺得非常之辛苦。我即刻同嚮導講，但係因為當時嘅地方附近都冇醫院，所以當刻佢地只係提供咗一啲緊急嘅藥物畀我作短暫嘅舒緩。我好快食完藥就瞓覺休息，希望聽日狀態會好返啲。
因為身體唔舒服，所以非常之難入睡，一直都感覺到頭痛，最後仲嘔咗出嚟，感覺到身體非常之虛弱。最後都係半醒半睡嘅狀態，一直去到凌晨 3:00 嘅時間。
去到呢一刻，其實我知道自己個身體依家最需要嘅係休息。但因為行程比較緊密，我哋要加快腳步按照原定時間出發，所以我都硬着頭皮，好快收拾好行裝出發。
但係開始咗唔夠半個鐘，我感覺到雙腳非常之冇力，同時間呼吸非常之困難，每行一步都非常之喘氣。我知道自己依家呢個身體狀態，唔能夠按照原定 7-8 小時完成，我唔想因為我一個人嘅身體情況而拖累其他隊友嘅進度，所以我主動向嚮導提出，叫其他同行嘅隊員先行前進，我行喺最尾嘅位置。
然後嚮導安排咗一位雪巴人陪同我。步行咗大約一個小時後，我已經見唔到前面其他嘅隊員，而我行得好慢，只係剩返我同另一位陪同我嘅雪巴人，兩個繼續前行。當時嘅我非常之感到焦慮，同埋有一種無形嘅壓力。因為當時係凌晨嘅時間，所以我哋需要戴住頭燈，而且當時落住好大嘅暴風雪，能見度好低，氣溫非常之凍，只有大約零下 15 至 20 度。
到達中途站
我只係望住自己雙腳，繼續喘着氣下行每一步。喺我身邊不斷有其他唔同嘅人經過、超越我，我就意識到自己真係行得好慢。當時嘅我真係好想放棄、掉頭就走，因為我真係好唔舒服。我內心好掙扎，呢個計劃對我嚟講只係啱啱開始，就已經遇到咁大嘅難關。
我當時每行一步，內心都會問自己：
「點解咁辛苦都要繼續行？」
「點解要做呢一件事？」
「點解咁堅持都唔肯放棄？」
「我係咪真係咁想完成？」
我喺內心問咗自己好多個問題，但係我都冇一個好確實嘅答案。可能就係好簡單——當自己好鍾意一樣嘢嘅時候，就算幾辛苦都會想繼續，有時可能唔需要太多嘅原因。
經過數小時、比其他人用多出一倍嘅時間，經過一番努力，我終於到達咗 Cho La Pass (5,367m)。我只係好簡單、帶住一副強顏歡笑嘅笑容影咗一幅相，之後冇停留太耐作休息。因為我已經比原定嘅時間慢咗一倍，所以都好快坐咗一陣，就起行出發去 Dzongla (4,830m)。喺呢個過程中我冇攞出手機去影好多嘅相，因為身體嘅不適，令我冇好好享受到當時嘅風景，只係耷低頭望住自己嘅雙腳一直行、一直行，一直同內心嘅自己對話。
最後經過數多小時，喺中午嘅時候到達咗 Dzongla (4830m)，終於可以好好坐低休息，但係身體都冇太大嘅好轉。而同樣地，Dzongla 都冇駐地的醫生喺度，所以我都只能夠靠住食一啲臨時嘅藥物嚟到舒緩身體嘅情況。加上伙食上我哋每日都只係食雞蛋、麵包、一啲簡單嘅粉麵，冇一啲高能量嘅食品；在住宿方面，每天都靠住一張好薄嘅床褥同棉被，喺高海拔同埋嚴寒嘅環境下瞓覺，所以喺咁多種因素下，身體都唔能夠得到一個好好嘅恢復。
----- 廣告 Ad -----
養精蓄銳
按照行程嘅計劃，我哋喺 Dzongla 休息一日後，就會出發去 Everest Base Camp (5,357m)，之後會再原路折返，再準備出發去我哋今次嘅最終目標— 島峰 (Island Peak，6,189m)。
因為經過嚮導呢幾天嘅觀察，同行一共 20 人入面，有一半人以上身體都開始感到不適，難以繼續前行，而當中我嘅身體狀況比較差。所以最後決定我留喺一個叫 Chhukung (4,730m) 嘅地方休息。而有數位隊友都因為身體不適，所以決定同我一齊留低。嗰度有醫生喺度，可以喺個度休息三天，然後為今次旅程嘅最終目標作最後準備；而其他身體狀況較佳的隊員，則照原定行程出發去 Everest Base Camp (5,357m)。三日之後我哋會再會合，一齊再出發去 Island Peak。
所以喺今次旅程，我選擇放棄咗去 Everest Base Camp (5,357m)。對我嚟講係有少少遺憾，但我知道以我而家嘅身體狀況，唔能夠去晒兩個地方，所以我必須要作出取捨。
喺呢三日休息嘅時間，我喺當地睇咗醫生。經過醫生作出一輪嘅檢查後，我最後得到嘅診斷係：急性高山症 (AMS)、上呼吸道感染同埋胃炎。
當我聽到呢個診斷，比我預期嘅情況更加差，起初我只係以為自己同其他隊員一樣，得到好普通嘅高山反應。醫生開咗一共十種唔同嘅藥物給我，而醫生畀我嘅建議係：我需要完全停落嚟休息，唔可以繼續向上行，如果繼續向更高嘅海拔走會好危險。醫生話我至少需要休息一至兩日，再觀察情況，先決定到我可唔可以繼續。
喺呢三日休息嘅日子裏面，我冇諗太多嘅嘢，只係集中喺休息方面。我想快啲令到身體個狀態可以盡快好返，然後為登頂作準備。因為呢一次嘅登頂唔止係一個里程碑，仲係作為準備出發我首座 8,000 米山峰嘅踏腳石，所以我唔會輕易放棄，走過嚟嘅每一步對我意義都非常之重大。
好快已經來到第三日。喺呢三日裏面，我每日都按照醫生開畀我嘅藥按足時間去食。到咗第三日，我感覺到狀態已經好咗好多，我覺得自己已經準備好。
而我都已經會合咗其他隊員，一同出發去 Island Peak Base Camp。而出發前都有睇過天氣預告，嚟緊一星期天氣都會較差，所以對於登頂會增加難度。
向高峰進發
我哋行咗兩個小時左右就到達咗 Base Camp，然後為登頂前作最後嘅準備：檢查裝備、做一啲技術訓練。然後我哋會喺當日夜晚嘅 12 點出發，預計第二朝早上 6 點左右會到達。因為喺高海拔地方瞓晏覺會好容易引發高山症，所以我哋當日唔會瞓覺，然後到晚上 12 點嘅時候就會出發。
好快去到晚上 11 點半，我哋食完最後嘅晚餐之後就出發。我亦都感覺到身體嘅狀態比前幾日好咗好多，出發一路上都好順利，同時因為身體嘅好轉令我信心大增。但始終身體都未完全康復，所以喺登頂過程中都會有少少吃力。我知道自己好有毅力，所以我唔會放棄，即使係面對住唔同嘅挑戰。
當中都有數位隊員喺登頂過程當中感到不適，決定返回 Base Camp 休息。但最後經過重重嘅難關，我都成功並順利登頂！
當刻我冇太大嘅反應，冇急住影相打卡，我只係靜靜咁坐低、合埋眼，感受當刻嘅一切。登頂一刻真係好開心，我感覺到自己已經準備好出發去完成我首座 8000 米嘅山峰。今次嘅登頂對我嚟講係一個好重要嘅經驗，喺呢個旅程我認識咗好多唔同嘅人，我體會到一樣嘢，就係：其實有時毅力比能力更加重要，唔好咁輕易放棄。
嚟緊下年，我已經同探險公司商討計畫，將會出發攀登我首座 8000 米嘅山峰——馬納斯盧峰 (Manaslu)，同時都積極尋找緊一些贊助商支持。而我計畫在未來 10 年內，用最短的時間成功登頂全部 14 座 8000 米高峰。
據我所知，暫時未有香港人完成到 14 座 8000 米嘅山峰，而喺全世界都只有少數嘅人能夠成功完攀 14 座 8000 米山峰呢個壯舉。呢個目標需要長時間嘅準備，所以我會喺未來積極投入喺呢一個目標，想展示畀其他國家嘅人睇到，香港人都一樣可以達到世界級嘅水平！
同時間，都希望可以透過今次簡單嘅投稿或小小嘅故事分享，令到多啲香港人對登山運動有所關注，同埋認識更多呢項運動。
讀者投稿，文字和圖片由 李鈺翰 (Marco)提供
