參加比賽唔一定係要互相比較，亦唔一定要為左衝時間，特別係夏季舉辦的比賽，要跑個好時間更加唔容易，所以好多跑友都會選擇在夏季比賽中以玩樂為主。而今年沙田跑友會(下稱沙跑)再次選擇夏季舉辦的7-Eleven Summer Run，同各位跑友一齊玩得盡興，繼續玩轉個比賽！
合照當然唔少得
在剛剛過去星期六晚所舉辦的7-Eleven Summer Run 2016，天氣約有攝氏35度，對於跑步嚟講真係比較熱。為左方便跑友們唔駛排隊等太耐車，亦可以坐得舒舒服服，所以沙跑今年繼續安排了「沙跑專車」，接送跑友由沙田新城市廣場前往比賽場地(科學園)。近半年的比賽前，我地都有向參加的跑友派發「沙跑打氣印水紙」，為大家打打氣，而今次當然都無例外，在車程中為大家送上我地的支持和鼓勵。
沙跑打氣印水紙
去到會場時見到唔少跑友已經一早到達，並且玩緊大會的攤位遊戲，拎左好多豐富的禮物，步都未跑已經一袋二袋禮品。我地亦盡快在旁邊的位置，設立了沙跑集合點，方便跑友作集合之用。
沙跑集合點
起步前留影
寄完個行李就影返張合照先，之後再去下廁所、熱下身、拉下筋，就埋位上線。今年的賽道起步係科學園內，都比較迫左少少，特別係起步時要轉出去海濱的位置，跑友們仍未分散，亦有柱及一級樓梯，所以都見到有些驚險情況。幸好今次主要參加都係為左「尋開心」，所以起步都沒有跑得太快，避得切條矮柱。
終點前的打氣團（終點後的支援小隊未能入鏡）
今年咁熱都跑呢個比賽，其實好多跑友都係超級fun run mode去玩。有d跑友選擇一齊沖線，有d都會拍住做時間，而多得打氣團係賽道旁的支持，大家都跑得好盡興。
識衝梗係一齊衝線
沙跑補給站
沙跑補給(特別鳴謝跑友送贈)
雖然大會都有在終點準備豐富的補給，但係大會的補給一般都好多參加者排隊，加上天氣的關係，沙跑為參加的跑友準備了不少補給物資。跑完之後跑友們先去沙跑補給站休息左一陣，飲下凍水降下溫，整杯冰凍可樂爽下，仲黎多杯寶礦力補充下，最後再食多幾舊冰菠蘿同埋冰桃增強能量。之後好多跑友都繼續去大會的各攤位搏殺，有人仲玩到要用紙箱去放禮物tim！
影相影到玩轉個攤位
玩完一大輪之後，再去影相攤位中影返張大大大合照，之後就乘「沙跑專車」回程去沖個靚涼，再去食個全馬，最後仲要整杯冰凍雪糕～ 完美呀！～
今次行程真係正到痺！
跑個5K食隻全馬
跑得咁辛苦當然要食返杯雪糕補補
特別鳴謝：
打氣團成員－文傑、Stella、芝士、芝士朋友、Alex、大ming朋友、Karen
補給物資－芝士、Admin團隊、沙跑活動基金
攝影－沙跑友sss
最緊要多謝你、你、你地的參與！
更多：
Fitz.hk Facebook專頁
[愛．跑回家] 黃竹坑至沙田篇
[I go to school by BUS] Human VS 巴士(Round 1)
賽前空肚食早餐 (本地篇)
Fitz Running 跑步
