[渣馬前夕] 也許 達標 這條路

2017，係跑步跑得好好嘅一年，身邊有好多唔同嘅人一齊練、一齊跑、一齊衝，而且參加過大大小小嘅比賽，成績都算係理想。10k，跑過啦；半馬，跑過啦；全馬呢? 冇勇氣! 咁唯有硬住頭皮報名。

抽過東京、京都馬拉松，唔中係一種解脫，但亦都有種失落。門關左，但總會搵倒個窗，無意中係 Fitz 見倒廈門馬拉松介紹，港澳地區免抽籤，加上120蚊報名費，正喎。掙扎之下最後都係報左名，後來發覺，呢件可能係今年其中一件最美好嘅事。

然後2018渣打馬拉松中籤，只可以講句”好事成雙” 。講返轉頭，話說2017年渣打半馬抽唔中，係有d失望，運氣一向唔係自己強項，為左避免同類事情再發生，所以係運動生涯當中，終於諗倒第二條絕世好橋，快過達標時間3小時30分鐘 (330)。

記得細個有位老師講過，當你目標係火星的話，衰衰地你都去倒月球呀，但唔去試，就只可以留係地球。所以我要離開地球表面，目標320，咁狀態差d都可以330。

之後既係數學題，要跑幾快呢?

算式係 (hour x 60 + min) / 42.195
個位係分鐘，小數位x60係秒數。

經過一番精密運算之下，得出320要跑4:40 pace，而330大概係5:00 pace，剩返既就係落街練跑。

我相信天賦，有啲人本身已經贏係起跑線：反應快、悟性高、身型好……即係如果你得米半高，同個2米高既師兄打籃球，對唔住，只能說你輸了；我相信錢既威力，可以將新手變到高手，唔信既話可以玩下而家啲手機遊戲。但去到長跑，我相信拼嘅係努力，比天賦、金錢更重要。所以當見倒大家進步神速既時候，只係佢地比其他人更加努力。感恩既係，自己係跑步過程入面冇遇倒咩傷患，可以好好努力，而當中最痛苦既經歷都只不過係撞牆，當撞到世界盡頭既時候，其實又進步多左少少。

練習好美好，每星期一次30k長課，由將軍澳經馬鞍山跑去沙田，自己慢慢進步，pacing開始越走越快，攪到自己瘋狂自我膨脹，覺得320唔係問題，應該跑得到。直到馬拉松前既星期一，嘗試走最後一課36k，結果一過30k就直線下降，最後跌埋出5分pace……好想再練，但時間已經唔容許。突然之間，有種巨大嘅無力感，330可能只係夢一場。

時間一轉，去到比賽前一日，可能因為太緊張，有啲消化不良，然後無所不用其極，將一堆酸奶、蔬菜水、活性乳酸菌飲品飲哂落肚，為嘅係要爆就一早爆，唔好跑跑下先黎爆，但結論係成效都唔太顯著。

比賽當日，大雨、凍。因為初馬關係，被安排第三槍08:20先起跑，為左避免塞人，老早06:50分已經企定定係起步區。當冇野做嘅時候，其中可以做嘅係諗定一堆藉口：

1. 前一晚太夜訓
2. 落大雨
3. 消化不良
4. 太凍
5. 第三槍跑跑下會塞人
6. 開跑前企得太耐
7. 星期一嘅長課未恢復哂
8. 前兩日食得太多油膩野
9. 熱身不足
10. 地下太硬

沾沾自喜諗倒十個之後，其實未跑已經好攰、好凍，想返酒店訓。但之後有個老伯迫咗上黎，佢號碼布有永久兩隻字，然後其他人同佢傾計，問佢點跑得完等等，字裡行間透露左佢已經82歲，同埋拎永久號係要完成廈馬十年，我當場崩潰，人地82歲諗點樣跑完，你28歲諗點樣放棄，仲講咩野地下太硬，羞家羞家，認真面對吧啦。

開跑，值得鼓舞嘅係沿路不時有人打氣：當佢地叫”加油”既時候，我知道佢地係叫緊我；當佢地叫”帥哥，加油”既時候，我心諗乜你地咁比面呀，我都要繼續努力先得；當佢地叫”美女，加油”既時候，我都明白你地都係幫我打緊氣，只係視力唔太好啫。

三十公里過後，已經冇一刻係唔想停，雙腳已經好攰、好硬、好緊，係我腦海既係 “比我跑多一公里先好停!” 而哩個諗法最後陪到我返到終點。雖然話係自己一個人跑，但每當諗到終點有人等緊你、背後有一班朋友支持你，已經叫我要比盡力要更盡多一啲。42.195公里係好長，但總會跑得完。

做到啦，回憶瘋狂湧現，有種講唔出嘅感動，感激陪我一齊走過嘅每個人。

“You will Never Run Alone”

有人會話跑馬拉松好on居，
或者應該學林海峰話齋，可能哩啲叫青春呢

諗返轉頭⋯⋯
那天，我到了木星。

渣打馬拉松，大家繼續青春常駐!