[扶輪香港超級馬拉松2018] 意想不到的比賽氣氛

由

2018-03-06

Fitz > 運動 Sports > 跑步 Running > [扶輪香港超級馬拉松2018] 意想不到的比賽氣氛

星期日 (4/3/2018) 和幾位跑友一起首次參加扶輪香港超級馬拉松，賽事是在中環龍和道跑23個圈(2.7km x 1) + (2.15km x 22)，全長50公里。其中要經過隧道的上落斜，即係要上46次斜。

這是一個名副其實的倉鼠跑，聽起來好像十分沉悶。但正正由於路線不斷重複，打氣的人群反而較為集中，而相熟的跑友也可以不停地碰面互相打氣。水站和補給站的義工由於每2公里多見面一次，到了中後期已經好似朋友一般每次入 pit 都會傾下計，所以感覺沒有想像中的悶，這方面反而有些驚喜!

真係特別要讚下水站和補給站的義工，他們十分友善主動，把水站和補給站打理得井井有條，而且也會為跑手打氣。每跑一圈，回到水站，大熱天時，見到他們在辛勤地倒水、切橙等等，都有一種見到朋友的感覺，這支持我們跑到終點! 由於沿途跑得十分辛苦，每次跑到補給站時，我都會容許自己逗留多少少時間，當是給自己的每圈一個小小放縱和獎勵。

補給品豐富而源源不絕，有橙、蕉、蛋糕、朱古力、水和能量飲品，在香港的路賽中算是十分豐富。

但是由於天氣十分悶熱潮濕，一開始已經覺得呼吸不太暢順，慢慢調整一下十多公里之後才開始進入狀態，並儘力按自製配速手帶的時間 (5:45/km) 去跑。頭大半程狀態還好，與全程結伴同跑的 Alen 兄有說有笑，路上遇到認識的跑友也會拍下照，傾幾句，在11k左右時更加速了幾百米陪完成接力的跑友衝缐。但34-5公里打後開始覺得很辛苦大跌速，開始要在上斜步行，意志也有點崩潰。最後完成時間是5小時14分，比自己目標時間4:47慢了廿多分鐘。雖然對時間並不滿意，但完成總是開心的!

大會方面，整體安排我會比佢合格。特別是賽事進行時有一個頗具規模的嘉年華在旁邊同時舉行，有不少攤位、有小食檔，又有兒童遊樂設施，親朋好友來打氣之外也可玩樂一番。

然而在一些細節上，我認為大會仍有一些不足之處，以下略述其中一些：

1.賽事前接近個多月報名，在選擇跑衣Size 時，竟然冇得揀size 只剩加大碼，take it or leave it…(其實係我自己犯賤啫，你係有權唔報嘅，冇人揸住支槍逼你一定要件加大碼嘅!)

2. 厚達五十頁的比賽場刋，只有三頁是真正和比賽有關的內容，包括一頁當日時間表和兩頁前冠軍訪問(但訪問做得十分「求其」）；其他和比賽有關的其本資料一點都沒有，例如場地地圖、比賽規則、賽道資料等等，通通都沒有! 幾十頁嘅內容全部都是扶輪各主席高層等等的大頭相。

然而，十分諷刺的是，大會同時在FB向跑手作了以下呼籲：「大會今年為了嚮應環保，希望減少紙水杯的用量，建議各位跑手當日自備水樽一個。」我真係好想知道，跑手慳返嘅紙杯，夠唔夠用嚟印呢本完全無謂的場刊。

(利申：小弟繼一月尾 CCM 全馬後，再次響應這個環保呼籲，全程攜帶私伙水樽，一隻紙杯也沒有用)

3. 大會在比賽前三日用電郵通知有賽事資訊更新，但在電郵內並無詳細講述具體變動內容，要自己上田總網頁查看。一看之下，原來是十分重要的改動：比賽圈數由25圈改為23圈，每圈距離畧增，由十分容易計算的每圈2公里改為2.7 km (第一圈) 及 2.15km (第2-23圈)。如此重要的改動，大會理應用盡所有途徑通知跑手的。但我查閱過大會的Facebook，他們連FB 也並沒有提過這個改動。

4. 比賽有工作人員數圈，而且會適時 (理論上) 向跑手報數。我今次預備得頗認真，自備了配速手帶，每圈亦仔細覆核，有信心自己沒有數錯圈，但心態上總是希望和大會工作人員確認一下。在最後一圈，我向報圈的工作人員查詢：「我506係唔係 last 呀?」工作人員回答：「我話唔到俾你聽係唔係 last 㗎喎!」明明2秒前我才聽到他對另一位跑手報圈，說他還剩下兩圈!之前我有好幾個圈，亦試過向工作人員查問，但他們都沒有向我報圈數，感覺十分奇怪!

5. 跑完後完賽獎牌是要去攤位領取的，而非由義工掛上頸，這個一早預咗我接受到。話晒都跑左50公里，好想飲一罐可樂慶祝一下，獎勵一下自己! 去到大會嘉年華攤位最尾尾位置的小食檔，見汽水售價＄10，價錢算合理。正想付款之際，工作人員說不收現金，要用大會的嘉年華現金券。

好! 唔緊要! 跑完超馬飲可樂是常識吧! 我就去買現金券! 一拐一拐之下以毅行上針山時的速度和痛苦程度行去100米外的攤位買，幾辛苦都要飲可樂! 但是去到賣現金券的攤位，工作人員竟然告知現金券最低消費是＄60。

大佬，我想飲罐可樂啫！比條路行下得唔得呀!

我雖然好鍾意跑完比賽後飲可樂，但係都未至於咁瘋狂用＄60買一罐，結果要捱到近一個小時後，才在附近的 IFC 用$8.8滿足了這個卑微的願望。