上圖，就係三月初舉行嘅「第一屆沙地阿拉伯女子馬拉松」，路程只係3公里。雖然，3公里嘅比賽的確唔可以叫「馬拉松」，不過呢場比賽別具意義，正字特警唔該通融一下。
現代嘅沙地阿拉伯由1902年開始建國 (到1932年正式立國)，女性地位一向極低。過去，婦女出街除咗要著長袍戴面紗，又唔可以揸車，大多數公眾地方亦唔歡迎女性。直到2017年，當局逐步放寬呢啲限制，首先容許女性入球場睇足球賽；到2018年6月，婦女又可以考車牌。
而呢場「馬拉松」比賽，雖然得3公里，不過絕對係呢個封閉國家嘅一大突破。雖然比賽名額只得 1,500人，但據當地傳媒報導，報名人數超過2,000；雖然唔及東京馬拉松咁難抽，但絕對反映唔少婦女都鍾意跑步。
因為當地法例之下，婦女外出仍然要穿著黑色 abaya 長袍，所以照片中所見，一眾跑手嘅「跑衣」都係一色一樣，唔睇號碼布都分唔到邊個打邊個。
結果，跑第一嘅 Mizna 以15分鐘跑完3公里。佢跑鹷四年，向記者表示決心要代表國家參加奧運。
呢千幾位婦女為咗跑步，著住長袍遮住塊面，喺熱帶地區太陽曬住都唔怕。大家可以隨心所欲咁跑，就真係要好好享受!
新聞來源：Clarion Project、Gulf News、Al Arabiya
Fitz 連結：https://fitz.hk/?p=89102
Fitz Facebook專頁
[找數真漢子] 關於東京馬拉松完走 我想說的是……
當完成一場馬拉松 不算是什麼一回事時
Fitz Running 跑步
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
