[帶著跑鞋去旅行] 意大利篇

唔經唔覺，喺意大利跑咗成30公里。

出發前比咗個目標自己，希望可以喺4個城市 – 羅馬、佛羅倫斯、威尼斯、米蘭跑一次，結果係羅馬同威尼斯跑咗兩轉，因為個天太靚喇，一起身就想衝出去跑同影相。

羅馬 Rome

作為古城，跑跑下隨時見到啲遺跡、歷史建築，記得第一次跑，一出門13度左右其實幾凍，跑到去聖天使城堡，日出嘅陽光配埋條河，成個景靚到喊，仲要四野無人，唔會有一點點嘅人頭喺畫面出現；再跑埋入梵蒂岡，撞啱神職人員 (應該係) 返工，一字排開嘅背影真心型棍。

佛羅倫斯 Florence

翡冷翠係我最鍾意嘅意大利城市，無論邊到做起點都要跑經聖母百花大敎堂，圍住360度走一轉，點睇都咁靚。

威尼斯 Venice

意大利水鄉算係4個城市中最唔好跑嘅地方，一來啲路高高低低連帶幾級樓梯，二黎就算朝早7點幾8點跑，條街已經好多拖住行李嘅朋友，所以要發揮左攝右攝嘅功力。不過，跑一轉可以睇晒東南西北嘅威尼斯，購物區、教堂、貢多拉、民宅、車站嘅一面都欣賞到，其實又幾爽。

米蘭 Milan

其實除咗名店區之外，周圍都係地盤工程，而且多分叉路，容易跑錯，好在啲小巷都通，而且主要都係跑過去米蘭大教堂。可以順個便兜埋去斯福爾扎古堡，除咗個景靚，隔離就係一個大公園，好多當地人都喺果度練跑㖭。

朝早跑嘅好處就係可以靜靜地欣賞下景色，跑錯路仲可以睇埋non-遊客指定嘅街景。小小可惜係張電話卡上網收得好差，啲記錄唔太準，好在都畫到條路出嚟!

HNR 跑步團隊 Facebook 專頁

Fitz 連結: https://fitz.hk/?p=95140