[揸車睇日落] 郊野公園禁區亂入罰款$2000

網上流傳呢張圖片，有電單車司機話想去萬宜水庫睇日落，點知去到北潭涌閘口，唔畀入，嬲嬲豬掉頭走。

不過眾所周知，郊野公園範圍係車輛限制區，公眾車輛 (無論幾多個碌) 係要申請先可以入去。呢位鐵騎司機可能要溫下書，睇多幾次《道路使用者守則》，佢咁樣揸車出街其實幾危險。

北潭涌閘口，廿四小時有職員駐守。

----- 廣告 Ad -----

閘口無職員都要小心

根據東網報道，唔少郊野公園車輛禁區，唔似得北潭涌會有職員看守大閘，令市民有意或無意都闖入禁區，威脅市民安全。各位揸車嘅山友，就要小心以下呢幾段路:

1. 金山道
2. 大欖郊野公園 (雷公田鮮奶農場一帶)
3. 城門郊野公園

上面呢幾處，有部份閘口長開，亦無職員駐守，有啲唔識睇路牌或者唔想睇路牌嘅司機，就會將汽車駛入禁區，影響郊遊人士。

雷公田入鮮奶農場之道路，有一段無閘口，但屬於禁區。

申請許可證守則

除咗專營巴士、小巴、的士、區內居民，以及官方單位，要拎到進入郊野公園嘅長期許可證，其實絕不容易。私家車想入郊野公園遊車河，一般嚟講都係唔批。

有以下原因，漁護署先會考驗批准私人車輛駛入郊野公園範圍 (通常係一日證)：

1. 旅遊巴士 (北潭涌閘口每日發30張)
2. 商業或公務工作 (會盡量安排在非假日)
3. 到區內探親 (據講到魚排釣魚BBQ嘅顧客，都可以拎到呢一種許可證)
4. 學術研究

城門主壩閘口，通常上鎖。

----- 廣告 Ad -----

所以，想揸部車入郊野公園遊車河，當局係唔會批准。而且漁護署喺申請書亦講得清清楚楚:

「公眾人士前往郊野公園遊玩時應使用“郊野公園內的巴士或專線小巴服務”，許可證只會在極為特殊的情況下，才會簽發給申請人作康樂用途。」

成功申請許可證嘅車輛，要將證件放喺車頭。所以，如果大家見唔到車輛有許可證，不妨致電 1823 投訴。有讀者更曾報料，試過深夜喺鉛礦坳營地聽到有人飛車，估計有人偷偷將汽車駛入禁區。

值得一提，某些水塘範圍嘅閘口同道路，雖然由水務署管理，不過如果路段喺郊野公園之內，漁護署亦有權抄牌，而有關告票，仲唔係定額罰款，係要上庭! (最高可被判處罰款2千元及監禁3年)

其實去得郊外玩，都係想接觸多啲大自然，呼吸下新鮮空氣，咪鬼揸車啦。

資料來源: 漁護署

Fitz 連結: https://fitz.hk/?p=97876