Fitz > 運動 Sports > 跑步 Running > [成都國際馬拉松] 夠班升級大滿貫?

最近國內媒體吹強風,話第一個中國嘅世界馬拉松大滿貫,將會落戶成都。

事緣係國內大企業「萬達集團」,舊年同世界馬拉松大滿貫聯盟 (World Marathon Majors) 簽訂協議,萬達會喺未來10年開辦三個新設嘅大滿實比賽,而其中一個將會在中國。

而呢個月,萬達全面贊助兩年歷史嘅成都國際馬拉松。於是,媒體就依此推斷,中國嘅一場個大滿貫賽事,順理成章會落入成都手中。

講財力,萬達貴為全球排名380名嘅企業,實力不容忽視。而萬達亦涉足各項世界級運動賽事,包括西班牙甲組足球隊馬德里體育會、中超聯賽,以至三項鐵人賽事Ironman。

萬達官網截圖

不過,係咪有錢就大晒? 國內有人已經對「成馬」升級為大滿貫頗有微言。原因係:

  1. 成都馬拉松今年先係第二屆,歷史甚短
  2. 佢只係 IAAF 銅級賽事,世界頂級選手都唔太有興趣參加
  3. 講口碑,中國有廈門馬拉松;講重要性,又有北京馬;講受歡迎,亦有上海馬。如成都馬一下子提升為大滿貫,相信會有好多人唔唔服氣
  4. 成馬國際馬路線大部份都係跑郊外,唔入市中心。就算當地跑友都缺乏興趣 (當地最受歡迎的是成都.都江堰雙遺馬拉松)

喺中美貿易大戰嘅陰霾之下,中國企業嘅銀彈政策又係咪可以話點就點,化腐朽為神奇? 睇怕中國第一個馬拉松大滿貫賽事,都唔會係呢一兩年嘅事。

資料來源: 新浪網

Fitz 連結: https://fitz.hk/?p=99650


更多:
Fitz Facebook 專頁
香港運動比賽時間表
Fitz Running 跑步