消委會最近測試咗51款預先包裝飲品,包括18款為無酒精碳酸飲品 (俗稱汽水)、16款運動及能量飲品,以及17款包括果汁同有味瓶裝水等飲品,發現唔少幾款飲品含糖 (指天然蔗糖) 超標,亦發現飲料大都含有甜味劑。

香港無規管甜味劑份量

「甜味劑」,俗稱「代糖」,係一種可為食物添加甜味嘅食物添加劑。由人工化學物或天然植物提取。呢啲添加劑比天然蔗糖更甜,用少少已經可以大幅提升飲品食物甜味。香港常見嘅甜味劑有呢幾類:

甜味劑名稱  (食物添加劑編號) 大約甜度  (砂糖的相對甜度 = 1)
醋磺內酯鉀 (950) 200
縮二氨酸基酰胺 (956) 2000
天冬酰胺 (951) 180
環己基氨基磺酸 (952) 30
糖精 (954) 300
三氯半乳蔗糖 (955) 600

根據衛生署介紹,聯合國以至世界衞生組織嘅專家,都會對甜味劑作安全評估,所以生產商現時採用嘅添加劑,已符合人體安全。香港當局亦跟隨國際組織做法,只要使用指定12款甜味劑,以及喺食物包裝上列明成份,無論有幾多甜味劑都可以合法銷售。

代糖屬甜味劑

甜味劑仍有風險

雖然話香港規管甜味劑法例甚為寬鬆,不過消委會對甜味劑似乎有所疑慮。佢哋今次研究51款飲料嘅甜味劑成份,原因正如佢喺《選擇月刊》之中話「甜味劑的健康風險不容忽視」:

  1. 不少甜味劑雖然不含熱量,但始終都係偏甜,研究指過量攝取甜味劑可降低味蕾敏感度,令人更加嗜甜,俗稱「甜上癮」
  2. 甜味劑仍增加蛀牙機會
  3. 甜味劑係近十幾年嘅新發明,醫學界仍未知道長期會唔會增加癌症,以及腸道疾病嘅風險,所以唔少國家仍有限制甜味劑使用
消委會測試的運動飲料 (《選擇月刊》截圖)

運動飲料中含糖問題

喺消委會代驗16款運動及能量飲品之中,除咗一款日本製造嘅 Topvalu 運動飲品,其餘15款都含有甜味劑「三氯半乳蔗糖」(955/E955),但注意寶礦力未有出現在今次測試。

令人放心嘅係,呢16款運動飲品大多數含糖量 (指天然蔗糖) 都屬可接受水平。只有3款葡萄適飲品及2款 Monster Energy 飲品,有含高量食糖危險 (超過人體每日所需的一半)。

紅圈為飲料每100克含糖量 圖:《選擇月刊

事實上,近年「減糖」、「戒糖」成為減重嘅主流方向,消委會呢個報告可以話極為切合大家需要。當全球17個國家已經向食物生產商徵收「含糖稅」,香港政府幾時先關懷一下大家健康呢?

完整報告,可參閱《選擇月刊


文章為作者意見,不代表Fitz立場。

歡迎投稿: http://fitz.hk/contribute/

永誠
講求綠色、環保、天然的健康生活。推廣新一代健康生活文化。