(左起) Vico、鄭劍輝、CW 楊志偉
越野跑一定係好辛苦、好孤獨？對於 Team Salomon 成員鄭劍輝 (阿輝)，以及兩位來自 R33 嘅越野新手 Vico 同 CW 嚟講，越野跑絕對可以係一班人嘅開心事。
2025 柴古唐斯括蒼越野賽，喺 Salomon Hong Kong 贊助同推動下，三人首次結伴同行。阿輝獲樂sir (廖科樂) 委託，帶領兩位新手完成人生第一場越野賽 (首野)，結果成就了一個友誼滿瀉嘅三人跑山組合。而家每星期，三人風雨不改一齊操練，目標係年尾一齊再戰柴古。
柴古「首野」變「瀨嘢」？
回想最初相識，阿輝笑言本身諗住去柴古唐斯，係自己跑自己enjoy:「我本身完全無諗住要去照顧人嘅，點知樂sir吩咐，話幫手照顧兩個參加25公里嘅新手，咁就唯有應承啦。」
Vico 笑言，阿輝要照顧他們二人，整個旅程即時變成「瀨嘢」，但事實上，阿輝身為前輩絕不馬虎，賽前兩日特登帶住 Vico 同 CW 去試跑賽道前段，由頭教起落斜技巧。CW直言，真係好感恩呢個試路環節:「我原本對柴古條路無乜概念，試完路起碼有個底，輝哥教咗我哋好多落斜技巧，真係好大得著。」結果 Vico 同 CW 不負眾望順利完賽，成績仲比預期好。
操練最緊要開心
柴古一役後，三人發覺目標一致又啱傾，後來於R33會慶聚頭，即時興起要一齊登上神山。雖然 Vico 最後因為高山反應，無奈未能登頂，但仍無損大家一齊向外闖嘅熱情，更確立咗今年最大目標 — 一齊再戰柴古唐斯，升級挑戰50公里。.
為咗備戰，三人而家每逢星期二、四晚上，都會一齊訓練 — 有時喺青衣運動場衝圈、或者到針草帽或者青衣自然教育徑操「夜山」，甚至一齊去gym練肌肉；沒有特定的program，有嘅係一齊操練嘅開心與決心。
CW:「輝哥返工已經好辛苦，有時見佢行入運動場個樣真係好攰，但大家一齊跑完去食飯，咩攰都無晒。」
對 Vico 嚟講，跑步最大嘅動力就係食同埋開心:「我比較貼近普羅大眾做運動嘅心態，想健康啲、當 social 咁，最好就係跑步可以食多好多嘢，食極都唔肥! 我唔係好競賽心態嗰種，有朋友一齊跑係好大嘅 motivation。」
阿輝亦非常認同呢種哲學，由運動場衝 Interval 到上山操長課，無特定要逼迫大家死頂，跑完最緊要係一齊食飯吹水，keep住團火唔好熄。
劍指今年柴古 50K：見證彼此進化
今年三人一齊特訓，阿輝睇住兩位新手大進化，語帶安慰分享:「Vico 以前跑 400 米，要成兩分幾鐘，而家1分40幾就得；CW 以前衝圈會面容扭曲，而家1K跑到4分頭都好輕鬆，真係進步神速!」
面對柴古 50K 嘅挑戰，CW 與 Vico 除咗自己操，亦有繼續參與 R33 課堂及工作坊，更會一齊報名參加本地賽事以戰養戰。Vico 笑言:「既然上年 25K 順利完成，覺得自己 handle 到，今年咪試吓再定下一個目標囉! 希望到時落山唔會好慘，可以繼續開心睇風景!」
Salomon 牽線，傳承越野火種
呢段難得嘅友誼，Salomon Hong Kong 絕對係重要推手。品牌一直致力推廣越野跑，鼓勵大眾走入山野。阿輝完美演繹了「傳承與分享」精神:
「以前我哋接觸越野跑嗰陣，無人帶住，全靠自己摸索。而家見到後生仔咁有 heart，我都想將經驗分享出去。大家一齊訓練、一齊進步，成件事真係好正。」
越野跑嘅路上，唔一定只有痛苦同力竭。好似阿輝、Vico 同 CW 咁，笑住跑、跑完食，帶住最純粹嘅快樂再戰柴古唐斯，可能先係呢項運動最迷人嘅地方。只要身邊有一班啱傾啱玩嘅戰友，再難嘅山，都可以輕鬆笑住上。
裝備分享: Salomon Spectur 3
備戰柴古唐斯50公里，除了上山操練，運動場上的速度課亦不可少。鄭劍輝透露，平時一星期會操六日，只有一日上山，其餘日子都是練習速度，所以一對合適的路跑鞋至關重要。
Salomon 今季最新跑鞋 Spectur 3，搭載全掌玻璃纖維板 energyBLADE，為跑手帶來極佳腳感。阿輝分享，Spectur 3 在高強度訓練時表現穩定，緩震感明顯。最令人印象深刻，係跑鞋強勁回彈及滾動推進感，無論係田徑場進行衝圈，定係高強度斜路訓練，Spectur 3 都能提供流暢動能轉換。
總括而言，Salomon Spectur 3 係一對適合競賽或高強度訓練鞋，阿輝特別推薦給追求推進力與穩定平衡的跑手，作為日常提升速度訓練的戰友。
