小品牌、大夢想 | 淺談三個小眾運動補給品品牌

占米 2024-03-08

上次講小眾運動品牌服飾篇，今次就講下另外一樣可能係大家課金最多嘅產品：補給。三個牌子已經係今年有香港代理引入，幾間 running specialty 已經出售中。

Näak

今年 UTMB 有一個品牌 Näak 成為 official nutrition partner，對比香港常見嘅能量食品，呢個品牌都幾新。特意睇下佢有咩產品，有 bar，waffle，drink mix 同 recovery protein 等，最意外就係一個產品叫 puree 嘅果蓉，對玩長途越野賽嘅朋友可能幾有新鮮感，起碼唔使成日食 bar 同 gel 咁悶掛 (戴番個頭盔先，筆者冇玩長途越野賽)。

圖片: Naak.com

圖片: Naak.com

Näak 係加拿大品牌，係英文 Nutrition for Adventurous Athletes who run Kilometers 咁解，兩位創辦人 Minh 同 Will 本身係加拿大三鐵代表，兩位之後亦轉玩長途越野賽，非常了解補級嘅重要性，佢哋希望用可持續再生嘅原料生產出有效嘅能量食品幫助玩長途賽嘅運動員或參加者。現階段 Näak 贊助好多頂級長途越野賽選手，包括長期留係香港嘅匈牙利藉跑手 Eszter Csillag；同時品牌亦稱產品適合大部分素食跑者。

----- 廣告 Ad -----

圖片: Naak.com

講番 waffle，自從 Honey Stinger 之後，香港好似沒有同類型產品係市場出現，呢啲產品對香港人嚟講可能係比賽食物，但有朋友指外國人會用 energy food 當小食。筆者試過 waffle 同 drink mix ，呢兩樣都係今次 Translantau 提供嘅補級，未知大家有咩意見。我個人覺得 waffle 好味，maple syrup 係 4 款之中最好食，而我只係試過練跑前食。Drink mix 就少少難搞，倒左落個 flask 再加水會好啲，筆者試過有水再加，就一直溶唔切，搞到成手粉同時又口感一般。

圖片: Naak.com

圖片: 代理提供

Precision Fuel & Hydration

呢度簡稱佢做 Precision，2011 Andy Blow 係英國創辦，佢畢業於 Sport and Exercise Science，年青時仲經常係短途三項鐵人賽事企櫈仔。每次轉玩長途賽事就會有抽筋或者其他缺水問題，包括低血鈉症 (英語：Hyponatremia)，所以佢就決定正視呢個問題，經過幾年唔同測試去計算自己補鈉同埋體液嘅方法去保持表現。過程中，佢得到心臟科醫生 Dr Raj Jutley 幫助，通過一個專利 sweat testing 去檢查身體得到準確數據，計算補級方法。現時最近香港可以做呢個測試地方有中國北京、泰國曼谷及新加坡等。

----- 廣告 Ad -----

圖片: Precision Fuel & Hydration

另外，網站都有提供方程式計算你比賽需要吸收幾多水份，carbs，sodium 補級等，外國都有好多評測將佢同神 gel Maurten 比較；Precision carbs 含量比較高，一包有成 30g，但係就缺少鈉，需要配合佢哋自己嘅 electrolytes 去補充呢方面。

筆者之前睇左 AP 介紹，就買左啲嚟試下，係金澤馬拉松就係以 PF30 同 PF30 caffeine 為補給，兩者分別同神 gel 設定一樣，分別只係有冇 caffeine，口味唔會太甜，易入口，上力係我嘅感覺，途中我都因應流汗，鈉質流失，有額外準備 2 包壽司郞嘅鹽直接啪。

佢仲有近年興起嘅能量軟糖、電解餅及鹽丸等產品，整個品牌都係圍繞耐力運動消耗建立，大家絕對可以一試。

Saurus

日本除左大家耳熟能詳嘅 aminovital 外，amino saurus 係今年新到香港，由 airfly 太陽眼鏡公司一併代理，同樣以 BCAA 產品作為主打。品牌係由日本知名三鐵運動員嵜本晃次 Koji Sakimoto 自我研發，將運動員所需放落產品度，非常適合運動員。除了跑步食用 gel，品牌將產品分為 3 大類：Performnace、Recovery 同 Body Make，證明係向專業發展，保證運動員多方面補給使用。

Saurus 有兩位比較著名嘅品牌代言人，分別係長友佑都同牧野英明：前者唔使多介紹，前日本足球國腳亦係創辦人之一；後者係著名跑步 KOL，係 Beams 開發事業部 (business development) 工作，主要負責運動跑步相關。

圖: 長友佑都

圖: 牧野英明 IG

同 Maurten 一樣，01 白色 gel 係有咖啡因，芒果味，02 黑色 gel 就含 BCAA，檸檬味；兩款口味都有約 25g carbs 同 0.6g 鹽份，官方建議長途比賽前半段應該先食用 01，係清晨作提神用；同時咖啡因可以促進身體消耗能量，加速脂肪燃燒；後期食用 02 就可以緩解肌肉酸痛。

2022年2月，品牌更加同 asics 合辦日本站嘅 Meta Time Trials，呢個係 Asics 為 Metaspeed 做嘅全球推廣活動。而創辦人 Sakimoto San 今年2月曾經係 On 日本總部作補級分享，分享比賽前後如何準備及恢復；近年亦有參加神戶馬拉松 EXPO，可見品牌已經係日本滲入不同跑步環節。