政府消費券首輪已經發放,有啲選擇慢慢搣,有啲選擇買心頭好,而運動手錶,自然都係選擇之一。喺露營上,運動手錶其實功能上無乜幫助到。不過同老hike一樣靜唔到落嚟嘅,會行入X咀,會潛落水底嘅,運動手錶就非常有用了。

喺選擇手錶之前,先問問自己,自己可能會玩嘅活動係咩? 跑山? 潛水? 踩單車等? 因為唔同手錶都有相當唔同嘅功能,所以最緊要揀隻啱自己的。當搵到自己所需,就可以搜索下啲有咩手錶啱自己,但其中有幾點需要注意。

續航時間

電量永遠都係電子用品嘅大敵,尤其是開咗GPS mode之後更為重要,一樣電子產品幾無敵都好,無電就係無用,所以首選一定係電量。

實體鍵

可能大家會諗「咩年代丫,仲用實體鍵」但喺户外活動時,實體鍵係有優勢,因為 touch screen 有一大敵 – 水。

喺户外流汗係必然,接觸水都係經常,如果係 touch screen,係會被水影響引致篤唔到甚至失控。唔止汗水,如果會游水甚至潛水,touch screen 喺水入面會因為水壓導致操作困難,連睇時間都可能走哂位。

防水度

現今手錶防水度都最少10米以上,一般洗手、煮飯、浸澗都唔太擔心,如有其他活動需求,留意返就可以。

高度氣壓計

氣壓,一般用hPa做單位,亦有用毫米水銀柱做量度,詳情非常之長,有興趣先再分享。當氣壓越低,落雨機會越大。而手錶的高度氣壓計會利用所在位置的大氣壓力變化判斷海拔高度同天氣變化,從而唔駛連接手機或網絡,都可以預告你知所在位置嘅天氣,對户外活動相當重要。

地圖導航

手錶錶面雖細,但手錶的 GPS 導航比手機安全得多,只要預先匯入路線,手錶就會帶領你到目的地,更唔需要經常拎手機出黎,可以空出雙手。

Ps. 建議留實體地圖做後備之用。

訊息提示

好多香港人都好緊張,驚死 miss 一個訊息、一個電話會世界末日,就算行山、露營中,只要電話一震,就要停低望下係咩事。訊息提示方便咗大家唔駛拎個電話出嚟,就可以 preview 係邊個、咩事搵你,減少雙手玩手機機會,多啲親親大自然。

中文顯示

接上題,如果手錶係無中文的,全部中文訊息都會亂碼,就算手機用英文 version,只要對方輸入中文 or 人名含有中文字,都會產生亂碼而睇唔到,所以除非你平時同朋友溝通都係英文,否則都係要用中文版。

連接提示

依個功能對本老hike相當重要! 因為本老hike係經常性跌電話,當開動連接提示時,只要手機一離開手錶10米,就自動會震,提示手機已跌。老hike多次憑此功能尋回手機。

活動項目

每隻運動手錶都有佢內設嘅活動,例如: 游水、跑步、踩單車等,可按照自己會玩嘅活動挑選。

音樂播放

有手錶仲有內置 mp3 播放器,可連接藍芽喇叭使用,咁就算手機唔跟身,都可以隨時播歌,仲方便過手機。

手錶有無用就見人見智,但決定買就唔好求其,手錶都係電子產品,產地同 QC 相當重要,小心爆炸。


文章為作者意見,不代表Fitz立場。
歡迎投稿: http://fitz.hk/contribute/
首頁 > 裝備 Gear > 裝備知識分享: 運動手錶