阿婆地牢內褲變專業品牌37億港元可以買到乜嘢?好多,衰啲講句,買起小弟都得…但係佢選擇買起你嘅卡路里同營養計數機。

實情係小弟不嬲用開一隻手機軟件,叫做MyFitnessPal, 仲經常推薦比其他人用。

簡單黎講就係一隻可以幫你記錄每日食過啲乜,計算卡路里輸入輸出,同埋幫你記錄蛋白質,碳水化合物同脂肪、營養等等嘅軟件。會咁樣計住計住嘅人係痴線嘅,不過同樣地,想將脂肪比減到10%以下嘅人都非等閒之輩,所以好啱佢哋用。

Myfitnesspal話說小弟亦痴痴地,所以好愛呢個軟件。至於點好用法?我承諾下篇同你介紹一下,而家講返主題。

大約個多月前(三月),MyFitnessPal突然自動更新,更新完之後,軟件圖案左上方突然出現咗一個熟悉嘅品牌Logo, 我認得呢個望落好似兩個櫻桃小丸子裡面野口嘅髮型上下放埋一齊嘅圖案,就係Under Armour(下稱UA)。

under armour我其實幾鍾意UA, 唯一係買唔起。

於是我就上網查過究竟,發現原來UA 喺今年二月正式收購咗MyFitnessPal,幾多錢?MY GOOD LORD! 475000000美金. 即係大約37億港元。

其實UA嘅瘋狂購物行為我之前亦略有所聞,因為佢曾經喺2013年用1.5億美金收購MapMyFitness,亦喺今年用8千五百萬美金收購咗著名運動軟件Endomondo

邊得嚟咁多錢瘋狂購物架~!

原來UA嘅老細叫Kevin Plank, 本身熱愛美式足球,1996年23歲嘅佢,發現自己嘅運動底褲排汗能力超強,所以就開始匿埋喺外婆屋企地牢,將啲底褲變成底衫。

唔知係咪第一批底褲係紅色,加上努力,專門跑去搵啲大學校隊,幫佢哋做隊衫,年尾就已經做咗萬幾蚊美金生意,亦好快遷出外婆地牢,開設自己工廠,形成而家上市公司嘅基石。。。

Kevin Plank呢個時候我又諗起讀書時候嘅一句說話:少壯不努力,老大淘古井… sorry… 徒傷悲。唉。

UA 之所以成功挑戰市場嘅既有大佬(Nike、Adidas、Rebook、NB…),除咗錢多,仲有佢嘅市場定位同形象做得非常專業,佢哋專門贊助美國州份大學嘅校隊,同埋國家隊嘅運動員,令人感覺佢哋真係認真做運動而賣,唔係因為以為你會相信蝕海皮、尋日信會認真做運動而買佢哋嘅產品。

越寫越似煽稿,我要澄清我從來唔寫煽稿的,純粹因為從來無人比過錢我寫。

而我所講嘅都係歷史同市場策劃上嘅嘢,而運動產品好唔好,係要用過先知的。

總之Under Armour 喺香港仍然屬於起步階段,能否打大佬挑戰成功,我拭目以待!

Under Armour參考資料:Wikipedia

更多:
內地版Garmin 810 糾偏出奇制勝! (一)
杜光庭其他文章
Fitz裝備文章