體育明星退休前都會謀定後路，唔少香港運動員唔係去電視台做旁述，就係返學校讀下書。外國體育明星更加鍾意搞下生意，用自己做生招牌，保證有錢途。
人稱「費天王」嘅網球巨星費達拿，今年已經38歲，雖然仲可以喺大賽打出水準，但始終英雄遲暮，亦要為未來打算。佢已經入股運動鞋生意過下老闆癮。
佢入股嘅公司，係佢老家瑞士嘅著名跑鞋 “On”。事實上，費達拿早前已完成同 Nike 嘅合約，成為 “On” 嘅代言人。與此同時，費達拿亦睇到 “On” 好有潛力，於是唔單止代言產品，仲索性科水入股，做埋老闆。
“On” 嘅其中一位創辦人 Caspar Coppetti 向記者透露，佢成日喺街見到費達拿著住對 “On” 去餐廳食飯，於是喺佢擔任 “On” 代言人嘅活動時，膽粗粗問費達拿有無興趣入股。
Coppetti 仲話「費天王」好鍾意儲鞋，屋企有成250對鞋，仲有好多 “On” 產品咁話。
未來日子，相信可以成日喺網球賽睇到選手著住 “On”。
網球場上 Nike 勁敵林立
過去幾十年，網球壇都以 Nike 同 Adidas 獨佔市場，近十年 Nike 更經常壟斷大滿貫賽事的總決賽 (即係決賽雙方都係 Nike)。不過，隨著日本球手成績突非猛進 (如錦織圭、大坂直美)，日本品牌亦開始攻佔網球場。
較為出色的有 Asics 和 Uniqlo。Asics 得到一哥祖高域加持。Uniqlo 除咗贊助費達拿球衫，仲有贊助日籍球手錦織圭。
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
