Team Fitz完成毅行者達成30小時內的目標後，隊長Law少除了與女友相擁而哭之外，Law少隨即除下行山鞋，丟入垃圾桶！原來呢個係佢每次行完毅行者嘅指定動作。
無可厚非，針對毅行者嘅操練，每個禮拜大大話話要行走30至50公里，半年就有成千公里。咁一對行山鞋，由毅行報名至出戰，真係行到要打柴啦！況且，古語有云：「舊嘅唔去，新又點會嚟？」
新款嚟講，Salomon出咗新Speedcross Pro系列。根據官方資料，呢款鞋以防滑鞋底做賣點（Contagrip），防滑橡膠可以喺濕地路防滑，粗底底紋加強泥地嘅抓地性能。而佢鞋底亦有獨特設計去加強承托，但同時又可維持整體嘅輕巧感覺（男裝650克一對，女裝550克)。
嗰日一拎到對鞋，第一時間著出街試下先。點知由屋企門口行去lift口，即刻畀佢嘅防滑性能嚇親。每行一步，真係會發吱吱咁聲。到我去到水塘，圍圈跑幾公里試下，更加證實呢款鞋真係做到官方資料所講，以輕巧同防滑見稱。佢無論喺碎石路、泥路、甚至石屎路面，亦畀到你足夠信心，去跨步奔馳，點都唔會驚會搧親。而且，佢輕巧得嚟又唔會過份單薄，畀到你足夠嘅支撐。
不過，比起一啲以有出跑山鞋嘅品牌（如Asics、Haglofs），佢鞋底偏向較硬。操唔夠K數嘅話，如要應付長途山路，就要做好預防起水泡嘅措施嘞。
香港建議零售價：$1440
更多：
Fitz.hk Facebook專頁
[開箱文] 傳說中的李寧赤兔!
[裝備pedia] 行山鞋挑選指南(買鞋篇)
Fitz Gear 裝備
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
