維基MALL呢排宣傳多多，唔少人都專登上去買下嘢。
Wiki Wong嘅HKTV搞網購，搞到要親身解答顧客投訴，成為一時佳話。有跑Group最近就興起上佢哋嘅網上Mall執平嘢。
某個跑步Group嘅跑友，最近就同維基個Mall買咗呢個Nathan跑步腰袋連水壼，標價$269，特價$215.2，買夠三件戶外用品仲有八折，即係大概$155。
至於好唔好用呢？呢位網友就有個簡單試用報告：
----- 廣告 Ad -----
- 網袋有足夠位放key,8達通，身份證同tissue.但電話放唔入（我部係iPhone 5s),不過對我影響不大，因我電話掛手臂
- 水樽位有橡筋cool住，不會跌出。但個水樽好大陣膠味，結果用左4-5spoon鹽加水浸咗一晚先辟度d膠味
- 整體個袋算輕身，顏色唔錯
- 開頭跑時我將個袋放係後面，一路跑覺得dun dun 吓，唔舒服，後來我將佢撥去側邊，即刻舒服晒，我唔知咁戴啱唔啱，但起碼感覺良好。途中飲水都冇大問題。
我就因為咁，專登上維基個Mall搵下有無跑步裝備賣。專門嘅跑步衣服鞋襪並唔多，反而行山露營嘅戶外用品就幾齊。其中，戶外用品公司Protrek就放咗唔少貨上去做特價。網友呢款腰袋，就其實由佢哋提供。而幾個行山品牌，好似話Vaude、Black Diamond同埋Haglofs都有特價。
Sophia
平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」