疫情下，「單車出行」成為多個國家發展政策，好似話英國投資逾億英鎊興建單車設施，歐洲大陸以及美國加拿大等，亦大規模推廣以單車代步，令單車裝備需求大增。Adidas 睇準呢個形勢，再度進軍闊別15年嘅單車運動。
用途全面環保製造
呢對 Adidas 最新產品，開宗明義叫 “Road Shoe” 公路單車鞋。官方聲稱呢對鞋並唔係針對精英運動員而設計，反而著重舒適度，令用家可以喺不同環境同路況都可以出入自如。
呢款 Road Shoe 使用回收物料製造鞋底，配合改良過嘅防滑釘凹槽，而佢亦放棄單車鞋常見嘅Boa撥盤而採用傳統鞋帶，據講更為舒適實用。
至於鞋面更係佢哋嘅重點之作，採用 Adidas 獨有 Primegreen 100%再生物料，具有出色排汗功能。
Adidas 暫時未有公佈 Road Shoe 重量、鞋底硬度等細節，不過已定於12月1日於網上商店公開發售，售價130英鎊 (約港幣$1300)。
資料: Cycling Weekly
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
