要衝時間就話著比賽鞋啫，平時練長課 (LSD)，我就會揀對有安全感嘅鞋了。無論係跑十幾、廿幾公里，甚至更長距離，沿途上上落落，跑到攰雙腿乏力，都唔知幾時會拗柴整親。呢個時候，我需要嘅，係一對有安全感嘅跑鞋。之但係，鞋又唔可以太笨重，否則好似拖住嚿石頭跑都唔方好得去邊。
最近試著咗ASICS GEL-KAYANO 25，就有條件成為一對心水 LSD 跑鞋。
好多跑友都知 GEL-KAYANO 以穩定見稱，呢個系列自1993年面世以來，經歷了25年，一代又一代的改良，黎到 KAYANO 25，採用咗 FlyteFoam Lyte 輕量緩震技術，配合埋前後掌都有 GEL 避震膠設計，著上腳感覺果然夠晒四平八穩，衝斜路都可以穩穩陣陣，轉彎、落斜果陣都包得貼腳踝無移位，減低受傷機會。如果鍾意嘅話，用黎跑樓梯訓練都可以。穩定性以外，鞋身唔會有太硬嘅感覺，包得貼雙腳之餘都幾舒服。
你話對鞋係咪好輕呢，又唔算， KAYANO 25 重336克，略重過上一代 KAYANO 24 的320克，但我覺得係可以接受，試過著住佢跑廿幾公里都未覺得係一個負擔 (題外話：汗水重啲囉……)，有信心再跑長啲都無問題。
睇返 ASICS 資料，KAYANO 25 鞋面採用輕量物料，中層係提花透氣網格，外層多方拉伸設計有助緊貼雙腳，增加咗整體舒適感。
GEL-Kayano 25 比到我最大感覺就係練長課可以 keep 住覺得好舒服，首先佢唔會好重，唔會跑跑下腳無乜力果陣變成一個「負擔」，可能之前我著過 GT-2000，跑耐咗就好明顯覺得重，相比之下 GEL-Kayano 25 係更好嘅長距離拍檔。當然你話佢話係咪好輕又唔係，練 interval 我都會著返「虎走」。
其次係佢包得住著腳，腳背位貼服、腳踝位亦箍得實，跑果陣腳掌唔會移位郁黎郁去。佢嘅緩震係抵讚嘅，例如落斜腳步大力咗都幫到我食一食，同埋佢鞋頭唔會好硬，無乜頂趾感覺。所以話，我覺得GEL-Kayano 25 比到一份安全感我嘅，雖然要衝時間練 interval 未必會揀佢，但 LSD 我會著住佢，啪 gel 兼著「Gel」，如果佢透氣度再好啲就更加好啦!
Fitz 連結: https://fitz.hk/?p=100969
Fitz Facebook專頁
[帶著跑鞋去旅行] 意大利篇
[HNR跑步團隊] 十條腿沖繩環島 後記
Fitz Running 跑步
HNR成員，講嘢明明好有meaning，但就俾人叫mean精。跑步黎講，鍾意跑街果種自由自在嘅感覺，雖然會吸咗唔少廢氣，但唔會講咁多廢話。
